Formula 1 Australia-ah bul an ṭan leh dawn ta

Formula 1 season ṭan turin team leh driver an inpeih tawh a, kumina intlansiak hmasa ber atan Pathianni chawhma dar 10:40 hian Australian Grand Prix tlan a ni ang.

Inelna an neihna tur hi Melbourne Grand Prix Circuit niin, he tlankawng hi kum 1953 a siam daih tawh kha a ni. A thui zawng hi 5.303 km niin kawng kawi 16 a awm a, intlansiak entu mipui 80,000 zet punkhawm theihna a ni.

Season thar inbuatsaih nan hian Barcelona-ah ni riat chhung ngawt test an nei tawh. Kuminah hian intlansiak vawi 21 a awm dawn. Grand Prix te hi Pathianiah an tlan ṭhin dawn a, Zirtawpni aṭangin practice an nei ṭan ṭhin.

Zirtawpni chawhma leh chawhnu lam bakah, Inrinni chawhma lam nen practice race vawi thum an nei a, Inrinni chawhnu lamah qualifying an tlan. Hmun dang ang lo takin Monaco bikah Zirtawpni chawlin Ningani chawhma leh chawhnuah practice hmasa ṭum hnih an nei ve thung.

A tlangpui chuan Grand Prix an tlan kawng hi 305-310 km vel a ni, ruah sur leh buaina lian dang a thleng a nih lem loh chuan darkar 1:10-1:30 vel hun an hmang tlangpui ṭhin.

Champion tur?
Tun hnai season dang ang bawkin zawhna awm sa a awm ṭhin, chu zawhna tunge Lewis Hamilton hneh thei ang? tih hi a ni. Mercedes driver hi world champion vawi li a ni tawh a, a theihna a san bakah car a neih ṭhat avangin rinkai leh el rawn a ni leh dawn.

Kum 2014 hnu lamah ringawt Hamilton hi vawi thum a champion thei a, 2016 khan a teammate Nico Rosberg a tluk lo tih mai loh chu midang chunga leng a ni. Kuminah hian Sebastian Vettel bakah Red Bull driver pahnih Daniel Ricciardo leh Max Verstappen te chu amah elphak tura ngaih an ni.

Chutih rualin Hamilton hi kum 33 mi a ni tawh a, a elpui Ferrari driver Sebastian Vettel aiin kum thumin a upa zawk. Britain tlangval leh German driver ropuite hi inel leh ber tura ngaih an ni, champion nomawi an kawl zat pawh a inang.

Vettel hian Red Bull car a kalh laiin a zawnin season li chhung world title a la thei a, team ṭha zawka ngaih Ferrari a zawm hnuah erawh Mercedes car khalhtute a la tluk thei rih lo. Season hmasa khan bul ṭan fuh viau mah se Asia-ah an hlawhchham a, an beiseina a tawp zui bawk.

Season hmasa Australian Grand Prix-ah khan Vettel-a'n hnehna changin a hnungah Hamilton a thleng. Ferrari driver hian season tir lamah point 14-in hma a hruai fal. Mahse, kum tawp lamah beisei a phak loh avangin a tawpa Hamilton a phak lohna chu point 46 zet a ni–champion tur chuan season tluana tlan ṭha nih a ngai.

Formula 1 intlansiak vawi 62 zeta hnehna chang tawh Hamilton chuan, "Hlawhtlin châka ka tuihalna hi kum riat mi lek ka nih lai aṭanga ka neih a ni. Kan zirtirtu chuan engmah tawng lo leh hlawh chhuak zo lo tur niin min sawi a, khami khan ka rilruah tumruhna leh hlawhtlin chakna min siamsak a ni," tiin a naupan lai aṭanga a rilru a la danglam loh thu a sawi.