Bale-a'n record siam chungin Wales chakpui

Gareth Bale-a'n China lakah hattrick a siam a, Wales tana goal khung hnem ber record a siam nghal - Real Madrid forward hian Wales tan goal 29 khungin goal 28 khungtu Liverpool legend Ian Rush a khum.

Wales hian Manchester Uni­ted legend Ryan Giggs en­kawlna hnuaia an match hmasa ber chu Ningani zan khan China Cup-ah khelin inelna thlengtu China chu 6-0 in an sawp.

Gareth Bale chuan, "Mipa naupang mai ka nih lai khan Wales tana record siamtu nih hi ka inring thei ngai lo a, vawiina he hun ka tawng ta mai hi ka tan chuan chawimawina ropui tak a ni," tiin a sawi.

Hattrick chu
Guangxi Sports Center, Nan­­ning-a inkhelah Bale che vel hmuh chakin mipui 36,573-in inkhel an en a, Real forward-in ball a khawih apiangin Bale lawm nan mipui au thawm hriat tur a awm ṭhin - minute hnihna lekah Bale hian a goal hmahruai a khung nghal.

Bale-a'n minute 21-na leh 62-naah a khung bawk a, kum 28 mi forward bakah hian Sam Vokes chuan goal hnih khungin Harry Wilson chuan goal khat a thawh ve bawk. Bale chuan hattrick a siam avanga a ṭhiante fak nghalin, "Mimal tak chuan he record siamtu nih hi a nuam em em a, mah se ka ṭhiante puihna avanga tun dinhmun thleng thei ka ni," a ti.

Real forward hian Wales tana goal 29 khung turin match 69 a mamawh a, record a khum tak Ian Rush khan match 66 aṭangin goal 28 a khung thung. Wales manager Ryan Giggs chuan, "Record ropui tak a ni a, Bale hi khaw­vela eng team tan pawh harsatna thlen turin a ṭha tawk," a ti.

Record zinkawng
Ningani zana Bale-a'n hat­trick a siam hmaa Wales hat­trick hnuhnung ber chu 2004 daih tawh khan a ni a, khatihlaia West Brom striker Robert Earn­shaw chuan Scotland lamah hattrick a siam - tunah Bale-a'n a chhunzawm ve leh ta.

Bale-a'n ram tana hattrick a siam hmasak ber chu October 2006 kha a ni a, hetihlaia kum 17 mi Bale hian Slovakia laka 5-1 a an tlawm ṭumin an ram mualpho zualpui tur khuh nan freekick aṭangin ṭha zetin a khung.

Kum 10 hnuah Bale-a'n June 2016 khan Slovakia lakah goal a khung leh a, hemi ṭuma a goal khung erawh mualpho khuhna mai ni loin kum 58 hnua Wales-in major tournament an khelh lehna hmasa ber tura goal a ni thung - Euro 2016 an inpetkai.

Wales boss Giggs chuan, "Rush-a record hi an khum ka ring ngai lo," tiin Bale a fak.

Record dang
Ningani zanah Gareth Bale chauh lo pawh Wales tana record siam an awm a, a hming chu Chris Gunter a ni. Reading defender hian goalkeeper ni lo Wales tana inlan hnem ber record a siam a, kum 28 mi lek nichungin ram tan match 86-a inlan tawh - Wales manager hlui Gary Speed (85) record a khum.

Gunter hian kum 2007 khan NewZealand lakah Wales tana a match hmasa ber a khel a, hetihlai hian tuna Wales coach Giggs pawh a la khel! Gunter hian a pumpuia record siam turin goalkeeper Neville Southall chu match ruk chiahin a phak lo tawh a, a kum ngaihtuahin a khum ngei dawn niin a lang.

Giggs chuan, 'Chris tan record ropui tak a ni a, Wales tan hian a khel ṭha tluang em em a ni," tiin ram tana koh a nih reng chhan a sawi.

China Cup?
Wales telna China Cup hi eng inelna chiah nge hre lo kan tam mai thei - international friendly match tournament anga kalpui a ni a, China ram football-in hma a sawn theih nan leh ngaihven a hlawh theih nana Chinese Foot­ball Association leh Wanda Sports Holdings-in an buatsaih a ni.

Kum 2017 khan China Cup hmasa ber khelh a lo ni tawh a, hemi ṭum hian a thlengtu China bakah Chile, Croatia leh Iceland an tel a, Chile an champion. Kuminah hian China leh Wales bakah Czech Republic leh Uruguay an tel.

Nizan khan Czech leh Uruguay hian match an khel ve bawk a, he inkhela chak zawk hian March 26-ah Wales nen final an khel ang a, a chak lo zawkin World Cup 2006-a Italy champion puitu Marcello Lippi enkawlna hnuaia khel China nen pathumna an inchuh ang. He thu buatsaih a nih lai hian an result erawh kan hre hman lo.