Bhowmick chungah Khalid thinrim lo
East Bengal technical director thar Subhash Bhowmick-a'n vantlang hriatah na takin Khalid Jamil dem mah se East Bengal coach hian Bhowmick a sawisel duh lo a, "A duh apiang sawi turin zalenna a nei," a ti.
Aizawl FC coach hlui hian a chhan sawi loin Thawhlehni leh Nilaini khan club training a zawm lo a, Ningani khan club office-ah kir mah se training erawh a la zawm chuang lo. Khalid chuan Bhowmick thawhpui duh loh vanga club training zawm lo anga sawi a nihna chu phain, "Ka dam ṭhat loh avangin training hi ka la zawm rih lo mai zawk a ni," a ti a, nimin khan club training a zawm.
Khalid chuan, "Subhash Bhowmick ka be tawh a, practice session neih dan tur kan sawi dun. Club-ah technical director a nihna angin ka bia a ni," a ti. Mohun Bagan coach hlui Bhowmick hian Khalid hi, "Biak ka tum a, mah se tun thlengin kan phone call a la chhang duh lo. Tu nge nia a inhriat? Khalid Jamil hian Pep Guardiola emaw Jose Mourinho emaw Sir Alex Ferguson emaw a inti tur a ni lo," tiin a lo sawi tawh.
Mahse, boruak sang karah pawh a buai ve ngai loh avanga 'The Cool One' tia hminglem an pek coach chuan, "Midangin eng nge an sawi ka ngaihtuah lo a, ka hna chu East Bengal tana theihtawp chhuah hi a ni. Ka tan chuan senior a ni a, ka chungchang thuah a duh apiang sawi turin zalenna a nei. Coach ṭha tak a ni a, sulhnu ropui tak tak a lo nei tawh. Ka unaupa emaw ka putea ang mai a ni," tiin Bhowmick chungah rilru chhia a put loh thu a sawi.
Khalid hian kum 2017 khan I League-ah Aizawl FC a champion pui a, hlawhtlin duh East Bengal-in I League chanchina Indian coach hlawh hnem ber ni turin kum hnih chhung atan nuai 125-in contract an ziahpui.
Mahse, Mumbai FC boss hlui hian beisei angin I League-ah East Bengal a hlawhtlinpui lo a, Kolkata club hi a chhuahsan leh mai dawn nia sawi a awm. Khalid erawhin a la cham zel tur thu sawiin, "Tunah chuan Super Cup chiah ka ngaihtuah. Chutih rual chuan season tharah pawh he club-a cham zel ka duh a, thutlukna chiang tak erawh siam a la ni lo," tiin a sawi.
Khalid hian I League-a Aizawl FC a champion pui ṭum khan Vanglaini hnenah Mizo club-a a cham tur thu a sawi a, mah se sawmna itawm zawk East Bengal lamah a kal.