Kohli ka hmachhawn hi ka vannei - Williamson

New Zealand captain Kane Williamson chuan naupan lai aṭanga Virat Kohli nen an inhmachhawn thei chu vannei a intih thu a sawi chhuak.

Kiwis captain leh Men in Blue captain te hi 2008 ICC U-19 World Cup-ah an inhmachhawn a, Kohli hoten nomawi an chawi. Hemi hnu hian vawi tam an intawng leh tawh a, nikum Cricket World Cup semifinal-ah Williamson-a hote an chungnung zawk.

Williamson chuan, "Kum naupangte kan nih aṭangin kan inhmachhawn a, cricket zinkawng kan zawh dun thei hi kan vannei hle. Hun rei tak kan intawng tawh a, ka ngaihlu takzet a ni," tiin a sawi.

2008 U19 World Cup semifinal-ah India-in Kiwis an hmachhawn ṭumin tun hnua player langsar Ravindra Jadeja, Trent Boult leh Tim Southee te pawh an tel a ni.