Argentina hmabak chu Brazil

Football thiam bik ram, sulhnu nei ṭha bawk Argentina leh Brazil ten South America an thunun mek a, ram lian pahnih hi Pathianni zan dar 12:30 hian Sao Paulo-ah an intawng dawn - tlawm loa World Cup qualifier khel mek pahnih inkhel hi a hmuhnawm ang.

Nimin zing South America ramten World Cup qualifier an khelhah Argentina hian Venezuela chu 3-1 in an luh chhuah. Brazil pawhin an player ṭha tam tak chhawr thei lo mah se Chile chu 1-0 in an hneh thei tho.

Tite-a enkawl Brazil hian match sarih an khelh tawhah an khingpui an la hneh vek. La Albiceleste pawh tlawm nei lo an ni, mahse Lionel Scaloni naute erawhin an khingpui vawi thum an inhnehtawk pui tawh, pahnihna dinhmun an luah.

Messi awmna
Barcelona captain hlui Lionel Messi-a'n Paris Saint-Germain a pan hnuah match khat chauh a la khel a, chu pawh bench aṭangin a lut. Mahse, Argentina manager Scaloni-a'n an captain hi inkhel turin a inpeih a ti a, ram tan chuan a bul aṭangin a khel nghal.

Argentina tan midfielder Rodrigo de Paul chu hun ṭha nei hmasa niin, hla deuh tak aṭanga a shot pawp chuan goal bar a per. Mualneitu Venezuela an ṭang thei viau a, mahse minute 32-naah defender Luis Adrian Martinez chu Messi a tih tluk avangin hnawh chhuah a ni.

Chawlhlawk hmain Inter Milan striker Lautaro Martinez-a'n midfielder Giovani Lo Celso hnen aṭanga a ball hmuh a khung a, second half-ah substitutes Joaquin Correa (71') leh Angel Correa (74') ten an khung belh - hun tawp dawna Yeferson Soteldo penalty khungin awmzia a nei tawh lo.

Venezuela hian World Cup qualifier bikah chuan Argentina an hmachhawn hnuhnung 14-ah vawi khat chiah chak an nei, an record chhe tak hi an siamṭha thei rih lo. Copa America champion La Albiceleste erawh tun hnaiah a zawnin match 21 zet tlawm loin an kaltluang ta.

Dan theih loh
Premier League club lian ten hrileng inkaihhruaina vangin an player an chhuahtir phal lo. Richarlison, Ederson, Alisson, Thiago Silva, Gabriel Jesus leh Roberto Firmino te chuan Brazil kohna pawh an chhang thei lo hial.

Tite-a'n a player ṭha ṭhenkhat chhawr thei lo mah se Brazil khelh dana khel thiamsa player a la nei hnem tawk. Team huaisen leh ṭha tia sawi ṭhin Chile meuh pawh an buzawlah 1-0 in an la luhchhuah thei, goal awmchhun hi Everton Ribeiro (64') khung a ni.

Player langsar inlan lo an tam tih vangin Brazil hi chhe ta duai sawi ngawm chi erawh an la ni hauh lo. Neymar, Casemiro, Marquinhos, Danilo, Alex Sandro, Vini Jr leh Lucas Paqueta ten bul an la ṭan thei a, ram lian dang hneh turin an la ṭha tawk.

Copa America kha Brazil hian an ngai pawimawh tawk lo deuh tia sawi theih a ni a, chutih rualin a neih ṭhat ber an thawh chhuah pui. An ramah ngei Argentina an ngam lo a nih kha, tunah chuan phuba lak let theihna remchang an neih hi bawhpelh an tum lo ang.