Ronaldo-a'n no. 7 a ha dawn

Cristiano Ronaldo chuan Manchester United jersey number 7 a ha dawn a, season liam taa jersey number 7 hatu Edinson Cavani-a'n jersey number 21 a ha thung ang.

Man United chuan, "Portuguese superstar-in club tana a khelh hmasak zawk ṭumin number ngaihhlut jersey number 7 a ha tawh a, tun ṭumah pawh hian number 7 bawk tih kan nemnghet e," tiin thuchhuah an siam.

Kum 36 mi Ronaldo chuan, "Number 7 hi ka la leh thei ang em tih hi ka chiang lo. Hawihawm taka min kiantu Edi (Cavani) chungah ka lawm hle," tiin a sawi ve bawk.

Cavani hian Daniel James-a jersey kalsan jersey number 21 a ha thung dawn. Ronaldo hian Republic of Ireland 2-1 a an hneh ṭumin goal hnih a khung a, Portugal tan goal 111 khungin ram tana goal khung tam ber record a siam.

Portugal captain hian chakna goal a khung lawm nan a kawr a phelh a, yellow card pek a ni. Ronaldo hi zanin dar 10:15-a Qatar nen friendly match an khelh turah inlan thei mah se hrem vangin Azerbaijan nen a inlan thei dawn lo.

Portugal football association chuan Ronaldo hi club thar Manchester United tana inpuahchahna hun ṭha a neih theih nan an chhuah tawh a, Real Madrid leh Juventus forward hlui hian England a pan tawh.

Covid-19 dan zawm a ngaih avangin Ronaldo hi ni nga chhung a inkhung hrang ang a, chumi zawh chuan Man United training a zawm dawn. Ole Gunnar Solskjaer-a hoten September 11, Inrinni zan hian Newcastle United an mikhual dawn a, Old Trafford ngeiah Ronaldo-a'n bul a ṭan thei dawn niin a lang.