Djokovic tan harsatna a awm lo

Novak Djokovic-a'n Grand Slam nomawi pali kawl khawm a tumna a la kaltluang zel. Serbian star hian Tallon Griekspoor chu harsa lo taka hnehin third round a inhlang kai a, a match lehpekah chuan Kei Nishikori a hmachhawn leh ang.

Ningani zan Arthur Ashe Stadium-a inkhelah seeded pakhatna Djokovic hian a tir aṭangin inkhel a thunun nghal a, darkar khat leh minute 39 chhungin 6-2, 6-3, 6-2 in a chak; US Open bikah hian first leh second round match 30 a khelh tawhah a la chak fai vek.

Hmabak Asian player
World number 1 Djokovic hi season hmasa US Open aṭang khan paih thlak a ni a, kuminah chuan chetsual nawn a tum lo. A hmachhawn leh tur Nishikori hian inkhel dangah tualchhung player Mackenzie McDonald chu 7-6 (7-3), 6-3, 6-7 (5-7), 2-6, 6-3 in a lo hneh ve bawk a ni.

Japanese tlangval Nishikori tan US Open hi a chet ṭhat tawh ṭhinna a ni a, 2014 khan final a lut hial. Mahse, a khingpui tur Novak nen an intawn tawhna vawi 19-ah ṭum hnih chauh chak a nei a, a tan fourth round luh beiseina a tlem.

Djokovic chuan, "Tum mumal tak nei chungin court chhungah ka inlan a, ka thil tum ang ngeiin ka che thei bawk. Ka match hmasa nena khaikhin chuan ka khel ṭha hleah ka ngai, chutih rualin hmasawnna tur chu a la awm zel," tiin a sawi.

Zverev a nghet
Tun ṭum chu Alexander Zverev-a atan hun ṭha a inher chhuak ve tawh dawn pawh a ni mai thei. German tlangval hian Albert Ramos-Vinolas chu darkar khat leh minute 14 chhung lekin 6-1, 6-0, 6-3 in a sawp a, tlang turin harsatna a tawk lo.

Tokyo Olympic champion hian break point vawi 15 a hmuh zinga pasarih a chhawr ṭangkai thei, point an vuak chhuah 117 zinga 77 zet a hmu thei bawk; tun hnaiah a zawna match 13 chak zawn thei a nih tak avangin inrintawkna pawh a nei sang ta hle.

Season hmasa US Open final-ah khan Zverev hi a tir lamah a khel ṭha, mahse set hmasa pahnih a lak hnuah Dominic Thiem a inlehthaltir, major title hmasa ber sual chhuah a duh a nih chuan dawhtheihna a neih belh a ngai, tunah chuan a inkhel a 'cool' ta deuh.