England tan World Cup a hnai

Qatar World Cup 2022 khel phak ngei turin England dinhmun a ṭha chho ta hle. Ningani zan qualifier inkhelah Three Lions hian Hungary chu 4-0 in an luhchhuah a, match li an khelh tawhah hnehna la chang vekin point 12 an hmu.

Euro 2020 khelhna zinga mi Budapest khawpuia inkhelah mikhual England tan Raheem Sterling, Harry Kane, Harry Maguire leh Declan Rice ten goal khat ṭheuh an khung a, mualneitu lamin fans ṭawngkam mawi lo bak chu minute 90 chhungin a chhan letna tur dang an nei lo.

Gareth Southgate-a'n Euro laia a rin zawh loh Jack Grealish chu bul a ṭantir a, Manchester City midfielder Grealish bakah Mason Mount leh Rice te thawhrah sengtu Sterling-a'n ram tana a match hnuhnung 24 aṭanga a goal 16-na a khung.

Pound maktaduai 100 man Grealish hian Rice-a goal khung tur a siamsak bawk a, hun tawp dawnah Arsenal rawlthar Bukayo Saka chuan a rawn thlak - manager Southgate-a'n Pathianni zana Andorra an hmachhawn hunah Grealish hi bul a ṭan nawn tir a nih pawhin a mak lo ang.

Hungary hi anmahni mualah chuan team khawng leh hmachhawn hautak tak an ni ṭhin, a bik takin fans rawva tak tak an neih chu an chakna hnar a ni ṭhin. Fans lam hian England pawh nasa takin an lo chhaih a, a bik takin Sterling leh Jude Bellingham te chu midum an nih vangin an au el nasa zual.

Inkhel boruak sang leh fans thawmnaah England an chiai lo. Amaherawhchu an player chunga hmuhsitna erawh an ngawihbo pui mai thei lo a, Britain prime minister Boris Johnson chuan a dem bakah FIFA chu hma la turin a ngen.

Tun hma pawhin Hungary hian midum an lo chhaih nawmnah nasa tawh ṭhin - FIFA chuan match thum chhung a hmuna entu awm thei loin a lo hrem tawh, hremna an hmang zo chiah a ni a, fans lamin an ze ngai an la sim lo, hremna nasa zawk an la hmachhawn leh mai thei.