Italy an chak zo lo

Euro 2020 champion an nih hnuah an match hmasa berah Italy an chak zo lo. Roberto Mancini naute hi an mikhual Bulgaria nen 1-1 in an inhnehtawk a, chak zo ta chiah lo mah se match 35 chhung chu tlawm loin an kaltluang ta.

Ningani zan World Cup qualifier inkhelah Azzurri tan Juventus midfielder Federico Chiesa chuan minute 16-na lekah box pawn aṭangin a khung a, eng zat nge an khung belh ang tih zawhna a awm laiin mikhual lamin Atanas Iliev-a hmangin an sut a, goal dang a lut tawh lo.

Italy hian goal khung tumin vawi 27 zet shot an nei a, mahse an hlawhtling hleithei lo - forward Ciro Immobile khung tur chu goal line aṭangin an pet chhuahsak hman a, point khatah an lungawi a ngai.

Ram leh ram inelnaah tlawm loa kaltluang rei record chu Brazil leh Spain ten an chelh a, match 35 an kaltluang thei - tunah chuan Italy hian an nihrual ta chiah a, record thar siam theihna remchang a nei dawn; Pathianni zanah Switzerland an lenchilh ang.