Kum 1993 hnuah Spain an chak lo

Spain chuan kum 1993 hnua a vawi khat nan World Cup qualifying-ah hneh loh an tawng a, Ningani zan khan Sweden lakah 2-1 in an chak lo.

Stockholm-a inkhelah Luis Enrique hoten bul an ṭan ṭha a, Carlos Soler hmangin minute lina lekah hma an hruai. La Roja tlarhnung chetsual avangin Alexander Isak-a'n Sweden tan second 12 hnuah siphurh a sut nghal.

Mualneitu tan Viktor Claesson-a'n minute 57-naah chakna goal a khung; Claesson hian Dejan Kulusevski hnen aṭanga a ball hmuh chu yard 12-na aṭangin a khung. La Roja hian March 1993 khan Copenhagen-ah Sweden ṭhenawm ram Denmark an hneh lo a, tun ṭum hi WC qualifying-a an chak loh lehna hmasa ber a ni.

Euro 2020-ah Luis Enrique hote hian semifinal hial an thleng. Amaherawhchu Spain hian Olympic-a medal lak an duh avangin Euro-a an player pawimawh Tokyo-ah an hruai a, tun ṭum qualifier-ah hian Pedri, Pau Torres, Mikel Oyarzábal leh Dani Olmo te an hahdamtir.

Chutihrualin Enrique hian Euro 2020 ang thoin squad-ah Real Madrid player a ko lo a, Sweden laka an chetsual leh bawk avangin Spain team hi hriatthiam an har hle.

La Roja hian ball possesion 75% daih chang mah se point an hmuh loh avangin Sweden hnuaiah an awm. Victor Lindelof-a captain-na hnuaia khel Sweden hian La Roja aia match khata an khel tlem chungin point hnihin an hmu tam zawk.

Group khat aṭangin team pakhat chiah an tlin nghal dawn avangin Enrique hote hi chak vek ve pawh nise tling nghal tur chuan Sweden chetsual a ngai dawn. La Roja hian Pathianni zan dar 12:15-ah Georgia an hmachhawn dawn a, point thum an hlawhchhuah ngei a ṭul dawn a ni.