Flick-a hoin Germany chak nghal

Germany-in coach thar Hansi Flick hnuaia an match hmasa berah Liechtenstein chu 2-0 in an hneh. St. Gallen, Switzerland-a inkhelah Die Mannschaft tan Timo Werner (41') leh Leroy Sane (77') ten goal an khung a, FIFA ranking-a 189-an ram lakah hian goal dang an khung belh thei lo.

Inkhelh banah Hansi Flick chuan, "Match hmasa ber a nih avangin hnehna kan chang hi a hlu. Kan khelh danah duhthusam lo lai a awm a, chutihrualin theihna sang tak ka nei. Inrintawkna kan neih leh a ṭul. Chutihrualin kan chak dana lungawi lo ṭhahnem tak an awm a, ka hriatthiampui," tiin an la khel ṭha tawk lo tih a pawm.

Germany hian ball possession 86% an nei a, Liechtenstein lamin goal venhim hna tawpah an neih avangin defence laia ding Niklas Sule ten attacking third-ah ball an sem pha. Amaherawhchu Werner bakah German tlarhmaa awmten goal khung an harsat thung.

Die Mannschaft hian Pathianni zan dar 12:15 hian an group hmahruaitu Armenia chu Stuttgart-ah an mikhual dawn a, Flick-a leh a hote tan fiahna hautak zawk a ni thei ang.