Liverpool an inren: Player pakhat chiah an lei!

Nipui transfer khar a ni a, Premier League 'Big Six' club-ten 'Liverpool tiam lohin' sum an seng nasa a, fan-te pawh an player lakluh danah an lawm thawkhat tih a lang.

Manchester United fans tan Jadon Sancho leh Raphael Varane lakluh ringawt pawh lungawi pui tham a nih tawh tehlul nen Cristiano Ronaldo an ko kir a, Old Trafford boruak chu ṭha tak a ni.

Chelsea-in pound maktaduai 97.5 zeta Romelu Lukaku an lakluh hnuah Saul Niguez an lak belh a, Manchester City-in Harry Kane la thei lo mah se Jack Grealish chu pound maktaduai 100 zetin an thlem lut a, transfer bazar an hmang ṭha hle.

Arsenal-in beisei ang result la nei lo mah se tun nipui transfer-ah pound maktaduai 145.2 zet an hmang a, Premier League-a hmang hnem ber an ni. Zawhna awm chu an elpuiten heti taka sum an sen laia Liverpool inseng tlem lutuk hi a pawi ang em, tih chu a ni.

A awmchhun
Liverpool-in May thla khan Ibrahima Konate chu RB Leipzig aṭangin pound maktaduai 36-in an lalut a, Liverpool fans tam tak chuan nipui transgfer-a an bul ṭanna chauh turah an lo ngai.

Transfer tawp ni, August 31 zan thleng khan Reds fan-te chuan 'engemaw' tak a thlen beiseiin an ring an fan awk awk a, Rennes forward Jeremy Doku leh Sampdoria winger Mikkel Damsgaard hming thlengin zanlai thleng khan a la 'ri'.

Mahse, transfer a tawp a, club tam takin an player lakluhte an puan laiin Liverpool-in player 'thar' puan tur an nei ve lo a, a bul ṭanna Konate kha a tawp kharna a ni tel nghal.

Fans ṭhenkhatin club neitu Fenway Sports Group an dem a, club hmangaih tawk loah an ngai a, coach Jurgen Klopp an khawngaih thu thlengin an tlangaupui. An demawm hran lo.

Tuma chiang
Mahse, Liverpool neitu FSG hian tum mumal tak an nei a, chu chu awmze neia sum sen a ni - player transfer ringawta uchuak taka sum sen hi FSG-in an tum lo a, stadium leh a hmun hma ṭha an ngai pawimawh tel a, heng ngaihtuah chunga player-a sum seng vak turin an neihin a tlin lo.

Nikum November khan pound maktaduai 50 senga an sak training ground tharah an insuan lut a, Anfield chei ṭhat hna chu pound maktaduai 60 bawr velin an thawk mek bawk. Hetiang a nih avang hian FSG hian player an hralh teuh a nih si loh chuan sum sen tur an nei lo.

Reds hian mamawh lo nia an inhriat Kamil Grabara ( Copenhagen), Liam Millar (Basel), Marko Grujic (Porto), Taiwo Awoniyi (Union Berlin), Harry Wilson (Fulham) leh Xherdan Shaqiri (Lyon) te chu an hralh a, Ben Davies (Sheffield United), Ben Woodburn (Hearts), Van den Berg (Preston North End), Leighton Clarkson (Blackburn Rovers), Jake Cain (Newport County), Sheyi Ono (Millwall) leh Rhys Williams (Swansea City) te loan-in an chhuahtir bawk.

Heng player rual hralhna atang hian Liverpool-in sum an hmuh let chu pound maktaduai 42.8 chiah a ni a, awmze nei deuha hralh theih tura ngaih Divock Origi, Neco Williams leh Nathaniel Phillips te beisei angin an hralh thei lo bawk a, a har ve a ni.

Sum lut chu
Reds-in player hralhna aṭanga sum an hmuh anga sawi hi pound maktaduai 42.8 bawr vel a ni a, FSG-in Liverpool an neih hnua an kalphung langsar tak pakhat chu player hralhna aṭanga bazar a ni - tun season-ah bazar-na tham an dawng tlat lo.

Chutihrual chuan nipui transfer hawn a nih hma khan Liverpool hian tum dan fel tak an nei sa nia sawi a ni a, chu chu senior player-te contract thar ziahpui a ni a, hetah hian sum a luanchhuah hnem dawn avangin transfer bazar-a chet aiin hei hi an ngai pawimawh zawk.

Liverpool-in Trent Alexander-Arnold, Fabinho, Alisson, Van Dijk, Andrew Robertson leh Jordan Henderson te contract thar an ziahpui ta ngei a, Sadio Mane leh Mohamed Salah pawhin rei lo têah contract thar an ziak dawn nia sawi a ni.

Reds legend Jamie Carragher chuan, "Tunlaia contract thar an sawite hi chu kan hunlai nen a inang tawh lo. Sum sen a tam em em a, kum li kum nga contract han sem rual phei chuan sum sen a tam em em a ni," a ti a, Liverpool chu season thar transfer-ah 'chet' an tum niin a sawi bawk.

An hlawhtling tlat
Liverpool tana thil lawmawm tak pakhat chu an player langsar ten cham an duh ve ta hi a ni a, player thar an lakluh loh avanga lawm lo tam tak pawhin hei hi an thlir thiam a ngai - he club hian Xabi Alonso, Javier Mascherano, Fernando Torres, Luis Suarez, Raheem Sterling leh Philippe Coutinho te ho a lo chelh thei lo tawh tih hriat a ṭha.

Chuvang chuan Liverpool tan an player langsarte chelh theih hi hlawhtlinna pakhat a ni a, contract thar leh transfer an thliar hrang thiam hi an sum hman thiamzia tilangtu a ni bawk. Chu mai a ni lo - sum seng vak loa a hlawhtlin theihzia hi an hre tawh tlat.

Champions League 2019-a Liverpool an champion khan mi tam takin Reds chu transfer-ah na taka chet chhunzawm turah an ngai a, mahse a ni hauh lo. Nipui transfer-ah Harvey Elliott, Sepp van den Berg, Adrian leh Andy Lonergan chiah an lalut.

European champion ni chunga Liverpool-in an lakluh player-te hi rawlthar pahnih leh back-up keeper pahnih a ni. Mahse, Premier League-ah kum 30 hnua a vawi khat nan Liverpool an champion a, nomawi chawi turin sum sen hnem kher a ṭul lo tih an pholang.

An hlawhchham ve tho!
Liverpool fans lungawi loten an bazar loh luat an tuarzia an sawi duh chuan season hmasa kha en tur an nei ve tho - an defender Dejan Lovren an chân a, Kostas Tsimikas, Thiago Alcantara leh Diogo Jota lalut mah se Lovren thlakna an nei lo.

Merseyside club-in buaina an tawk zui a, Virgil van Dijk, Joel Matip leh Joe Gomez an inhliam a, Jordan Henderson leh Fabinho te centre back-ah an khelh a ngaih chang a awm fo a, nomawi chawi loin Reds-in season an khar.

Tun nipuiah Liverpool-in Georginio Wijnaldum chu Paris Saint-Germain lakah an chân a, Dutch midfielder hian season hmasa khan Reds league match zawng zawng a khel vek - mahse, nipuiah a thlak tur an lalut tlat lo. Tihsual nawn an duh em ni? tih palh mai awl tak a ni.

Shaqiri pawh player pawimawh tia sawi tur ni lo mah se bench aṭanga inkhel thlak danglam thei khawpa theihna nei sang player a ni a, thlaktu tur an lalut lo - rawlthar Elliott hi player thiam tak a ni ngei a, mahse, midfield-a an player chânte hmun ruak luah tur anga sawi erawh a rem lo.

Tlarhma hi
Liverpool tlarhma en ila, Mohamed Salah, Sadio Mane, Roberto Firmino leh Diogo Jota an awm a, Premier League-ah anni aia duhthlan tur an awm chuang lo. Mahse, inhliam ve thei an ni tlat - tunah Firmino a inhliam mek.

Reds-in tlarhma pali thachhang dawl tura an neih chu Takumi Minamino leh Divock Origi an ni. Minamino hian Anfield-a pan hnuah beisei a la phak lo a, Origi hi Champions League nomawi an chawi nan thawhhlawk viau mah se a theihnain a phak chin kan hre tawh.

Tlarhnunga 'inhliam palh' buaina chinfel nan Reds-in Konate an lalut a, tlarhma lam an ngaihthah leh si - season hmasa tlarhnung lama an thil tawn ang kha tlarhmaah tawng thei tho an ni a, hei hi fans rilru tihahtu a ni.

Chutihrual chuan player ṭha kawl hnem lutuk hi buaina thlentu a ni ve thei tho a, mahni thu duh ve tak Klopp-a'n buaina awm thei thlir lawkin bench-a lungawi lo tur player lakluh a duh lo a ni ve thei - an dam ṭhat phawt chuan Liverpool squad hi champion turin an ṭha tawk a, an dam ṭha reng ang em? tih erawh hunin min la hrilh ang.

Sum sen hnem hi hlawhtlinna a ni kher lo tih erawh hriat a ṭha - a awih lo tan Arsenal zawh theih a ni.