Nepal leh India an inhnehtawk

Indian Super League-ah sum tam tak a awm tawh chungin India-in ṭhenawm ram Nepal laka result an hlawhchhuah theih sang ber chu draw result a ni a, Ningani zan khan international friendly match-ah 1-1 in an inhnehtawk.

Inkhel ṭantir aṭangin team pahnih an inhlau lo tawn a, goal khung hmasa zawktu erawh Nepal an ni - Nepali forward ṭhangduang Anjan Bista chuan minute 36-na lekah a khung a, Dasharath Stadium, Kathmandu khawpuia Nepal fan-te thawm a ṭha hle.

Goal dang lut loin chawlhlawk hman a ni a, Blue Tigers hi anni aia hniam zawka ngaih Nepal lakah an mualpho dawn niin a lang hman hial. Mahse, Sunil Chhetri dah bo reng theih a ni lo.

First half-ah India Captain hi Nepal defender rualin an din hual reng avangin a che hlei thei lo. Mahse, minute 60-naah penalty box pawn aṭanga a 'shot' ṭha zet chu Nepal keeper Kiran Chemjong chuan ṭha zetin dang mah se a dang per.

Roundglass Punjab FC keeper hlui 'shot' dan hi Anirudh Thapa chuan a nang hman a, Chennaiyin midfielder hian hnai set sawt aṭangin goal-ah a chantir - team pahnihin hun tawp thlengin goal khung belh tum mah se goal an khung thei tawh lo a, 1-1 in inkhel a tawp.

Mizo tlangval Lalengmawia chu minute 63-naah luhtir a ni a, Mumbai City midfielder thar Apuia hian Suresh Singh Wangjam a thlak - result erawh a thlak danglam thei bik lo. Vaivakawn tlangval hi Nepal-a zin chhuak India squad-a Mizo player awmchhun a ni.

September 5, Pathianni tlai dar 5:15-ah India leh Nepal hian friendly match an khel leh dawn a, team pahnih inkhel hi Indian football team facebook page (https://www.facebook.com/TheIn...) lamah live-in en theih a ni ang.

Inkhel Result
India 1-1 Nepal
IND: Anirudh Thapa 60'
NEP: Anjan Bista 36'

September 5, Pathianni

Nepal 5:15 PM India