Barty a la kal fawr

US Open khelh laiah Ashleigh Barty tan hna harsa a la awm lo. Australian star hian nimin zing khan Clara Tauson chu 6-1, 7-5 a hnehin third round a inhlangkai a, major tournament bikah match 50 a chak tlinna chiah a ni nghal bawk.

Seeded pakhatna hian awlsam takin set khatna a la, set hnihnaah pawh 5-3 in a kal fawr leh hman. Danish tleirawl Tauson-i'n rawn hnaihchilh ve hman deuh mah se chesual loin Barty hi a tlang.

Kum 25 mi Barty hian Shelby Rogers a hmachhawn leh dawn. Tualchhung nula Rogers hian inkhel dangah Sorana Cirstea chu 7-5, 6-2 in a lo hneh ve thung a, Grand Slam bikah chuan quarterfinal bak a la thleng ngai lo - a tan Barty hi hmachhawn a hautak dawn.

Inkhel dangah Angelique Kerber chuan Anhelina Kalinina chu 6-3, 6-2 in a hneh. Grand Slam vawi thum champion tawh hian 2017 US Open champion Sloane Stephens a hmachhawn leh dawn, tun inelna bika match ngaihven hlawh ber a ni rih ang.

US Open-ah hian beisei loh result langsar kan la hmu meuh lo. Player ṭha an chak deuh zel - Bianca Andreescu, Iga Swiatek, Petra Kvitova, Maria Sakkari te chuan an khingpui ṭheuh hnehin second round an paltlang bawk a ni.