Mipui tan ka chak ka beisei - Verstappen

Max Verstappen chuan tun kar tawpa Formula 1 Netherlands Grand Prix an tlan tur a thlirlawk a, an rama inelna neih turah hian Dutch mipuite tan hnehna chan theih ngei a beisei a, theihtawp a chhuah tur thu a sawi bawk.

Inelna an neih hnuhnung Belgian Grand Prix kha ruah surin a tibuai a, inelna an nei mumal thei lo - qualifying lama che ṭha ber Verstappen chu chaka puan a ni a, champion lai Lewis Hamilton leh a team Mercedes chuan pawm thiam harsa an ti hle.

Red Bull driver Verstappen chuan, "Belgium rama kan awmdan kha chu tumahin an beisei lawk loh thil a ni, harsatna kara point ka hmu thei erawh ka vannei a, a lawmawm takzet.

"Tunah chuan kan ramah inelna kan nei dawn, min thlawptu tam tak an awm tih pawh ka hria, kei chuan team leh kan ram tan theih tawp ka chhuah dawn a, an lawmna ka thlen theih ngei pawh ka beisei," tiin a sawi.

Car intlansiakna sang ber season kal laiah Hamilton-a'n point 202.5 hmuin hma a la hruai a, amah hnaih bertu Verstappen hian point 199.5 a hmu thung - inelna neih hmabak an la ngah avangin a la ngaihnawm dawn chauh.

F1 Dutch GP hi Pathianni zan dar 6:30 hian Circuit Zandvoort-ah an tlan ang.