Nipui transfer: Premier League player pem ve ta lo te

"Mipain thuthang satliah an sawi uar lai ber chu football transfer lai hi a ni e," an ti thin a, nipui transfer a thlen meuh chuan thudik leh dik tawk lo chhiar tur a awm nuai a, rin tur ber hriat a har thin.

Mizorama European football tuipuitute pawn chaw eikham thingpuisen hang nen an club ṭante player lakluh tur an sawi a, an player duhzawngte kalna tur an sawi a, a ṭhen an ring dik a, a ṭhen an ṭhelh duai a!

Football transfer bazar boruak kha a ni miau a - ṭhenkhat an player duh zawng tak an lakluh avanga an zuan tawr tawr laiin ṭhenkhatin mittui nen an player duh em emten an club ṭan an chhuahsan lai an thlir vawng vawng a, hlimna leh lungngaihna a inchawh pawlh nuai ṭhin.

Transfer bazar hi chu mak ve tak a ni - ṭhenkhatin rin loh taka an player-te an chân laiin club leh fan te pawhin chhuak ngei ngei tura an ngaih, chhuak ta lem lo an awm ve nual tho.

James Rodriguez (Everton)
Thla 12 liam taa Everton-in Rodriguez an lakluh khan ani ang player 'class' lakluh theih an inbeisei lo a, Everton-in thil tum lian tak an nei tih pholan nan Colombian attacking midfielder hi an hmang.

Mizo BTS fan-ten Millenium Centre-a Jungkook-a thlalak lian tak an uai thlak tir ang maiin Colombia leh Miami inchhawng sangah Everton-in James-a thlalak an tar a, beiseinain an khat.

Mahse, Everton-a James thlem luttu Carlo Ancelotti-a'n Real Madrid a pan a, Colombian player hi a hawihai ṭan - coach thar Rafael Benitez-a'n club tana rilru pe tawk lo tiin a sawisel a, tun dinhmuna a lan dan chuan an inchhawr hmel loh.

Nipui transfer-ah Porto nen sawizawm ni bawk mah se Rodriguez-a'n a lar chhuahna Portuguese club a pan chuan a hlawh tihhniam a ngai dawn - Porto a hnar a, Everton-ah khel lo chunga kar khata £200,000 hlawh a duh zawk niin a lang.

Eddie Nketiah (Arsenal)
Crystal Palace-in Arsenal aṭangin Eddie Nketiah lakluh an tum a, pound maktaduai 10-in Gunners hi an dawr. Mahse, London Hmar veng club hian pound maktaduai 20 an chhiar a, Palace an inhnukdawk.

Arsenal hian pound maktaduai 15-a tawlh hniam an hreh lo nia sawi a ni a, mahse, Palace-in Celtic forward Odsonne Edouard chu pound maktaduai 12-a lakluh an thlang ta zawk. Kum 22 mi Nketiah erawh Pierre-Emerick Aubameyang leh Alexandre Lacazette inkhel lai en turin a cham a, thla 10 bak contract a nei tawh lo.

Gunners left back Sead Kolasinac pawh Fenerbahce lamah kal tura ngaih a ni a, mahse, Emirates Stadium-ah a cham chhunzawm ta zawk - Fenerbahce president Ali Koc chuan sum an phut hnem luat vanga inrem thei lo an nih thu a sawi.

Ali chuan, "Kolasinac aiawhten min bia a, kum thum chhung contract ziah a, kum khata euro maktaduai thum hlawh an ngiat. Contract ziah ruala fee atana euro maktaduai thum pek an ngiat bawk," a ti a, Arsenal-a hmun chang phak lo tana heti zat sum sen an tum loh avangin an inrem ta lo.

Ross Barkley (Chelsea)
English player beiseiawm pawl kha a ni ṭhin a, tunah erawh Barkley-a'n Chelsea-a khelhna hmun chang phak loin hun a hmang mek a, nipui transfer-ah a khelh phakna tur club a zawm mai tura ngaih ni mah se Stamford Bridge-ah a cham.

Kum 27 mi attacking midfielder hian season hmasa kha Aston Villa-ah loan-in hun a hmang a, beisei angin a khel chhuak lo. Burnley nen sawizawm ni mah se a pan ta lo a, a kar khat hlawh £100,000 chu club tam takin an ngam loh chhan anga sawi a ni.

Chelsea coach Thomas Tuchel-a'n Barkley hi a chhawr thut a rinawm chiah lo a, January-a thlasik transfer-a inhawn leh zet hma chu hlawh tam tak nei chunga inkhel loin hun a hman phawt a ngai dawn niin a lang.

Barkley hi pre-season friendly match-a Bournemouth leh Arsenal nen an inkhelh ṭumin a inlan a, mahse, Tottenham Hotspur lakah chhawr a ni lo a, entu awm loa non-league club Weymouth nen an inkhelh hnuah hmuh a ni leh tawh lo - Turkey leh Russia-ah transfer an la khar loh avangin beisei erawh a la nei.

Hamza Choudhury (Leicester)
Bangladeshi thisen kai Hamza Choudhury-a'n nipui transfer-ah loan-in Newcastle United a pan dawn nia ngaih a ni hman a, mahse, nipui transfer an khar meuh chuan Leicester City-ah bawk a cham.

Foxes academy chhuak defensive midfielder hian Brendan Rodgers-a hnuaiah hmun a chang phak meuh lo a, Magpies chauh lo pawh club tam takin loan-a hawh an duh nia sawi a ni - a chhuah loh chhan a hriat loh.

Leicester hian defensive midfield-a khel turin Wilfred Ndidi leh Nampalys Mendy an nei sa a, Ligue 1 champion Lille aṭangin Boubakary Soumaré chu pound maktaduai 17-in an neih belh bawk.

Season hmasaa league match 10 chiah kheltu player hian thilmak tak a thleng a nih loh chuan tun season-ah hmun a chang tlem lehzual ang tih a chiang a, January transfer inhawn hun nghakhlel taka thlir chu a tih theih a ni.

Player dang
West Ham defender Winston Reid-a'n tun season-ah chhuah inbeisei viau mah se a chhuak lo a, Hammers tana competitive match a khelh hnuhnun ber chu March 2018 kha a ni tawh - Swansea City lakah 4-1 in an chak a, a khupah hliam a tuar.

New Zealand international hi rei tak inkhel loa a chawlh hnuah MLS club Sporting Kansas City leh Championship club Brentford lamahte loan-in a chhuak a, kum 2023-ah a contract a zawh chauh dawn bawk si avangin January nghah leh phawt chu a tih theih a ni.

Jaroslaw Jach-a'n January 2018 khan Crystal Palace a zawm a, Polish club Zaglebie Lubin aṭanga English club a zawm tirh hian beiseina sang viau mah se loan-in Turkey, Moldova, Poland leh Netherlands-ah te a khel kual a, Palace tan match khat chiah a la khel ve.

Kum 27 mi lek a la nih avangin a career tuai thar turin hun a la nei a, mahse, tun nipuia a chhuah loh avangin thla ruk vel tal chu inkhel loin hun a la hmang leh dawn tihna a ni.