Federer a chak lo nawn

World number 1 Roger Federer chu tun hnai ni ruk chhunga a vawi hnih nan a chak lo a, clay court season a hman dawn loh avangin number 1 nihna pawh a hloh chhunzawm dawn.

Nimin khan kum 36 mi Federer hi world number 175 Thanasi Kokkinakis lakah 3-6, 6-3, 7-6 (7-4) in a chak lo, Swiss tlangval hian Miami Open nomawi a kawl lai a humhim thei dawn lo–hneh nei loin a tla.

Kar hmasa khan Federer hi Indian Wells-ah Juan Martin del Potro hneh loin nomawi a chan tawh bawk, match 17 chhung zet hneh loh nei loa season a hman lai a tawp a, a chak loh hnua a tournament khelh leh hmasak berah a tlawm nghal bawk.

Grand Slam vawi 20 champion tawh Federer chuan, "Hun ṭha ka neih apiang ka khawhral a, ka chet fuh loh ni a ni e. Clay court season ka hmang dawn lo tih ka sawi chiang nghal bawk," tiin a sawi.

Federer hi a kum a tam tawh a, inelna zawng zawnga inlan turin a taksain a tlin tawh lo. Nikum pawh khan clay court inelna zawng zawng a khel lo a, grass-ah rawn kir lehin a vawi riat nan Wimbledon title a la zui thei. A vanglai pawha a chet fuh hleih theih lohna clay-a inkhelh a tum lo hi thil thar leh mak a ni hran lo.