Rokima goal nen India champion

Hong Kong-a Jockey Club International Youth Invitational Football Tournament-ah India Under-16 chuan nimin khan inelna thlengtu Hong Kong 4-2 in an hneh a, an champion–goal khat hi Mizo rawlthar Lalrokima khung a ni.

Ram pali inelna tournament-ah hian India bakah Hong Kong, Singapore U17 leh Chinese Taipei U17 te an tel a, an inkhelh kual vek hnuah point hmu sang ber an champion. India hian Hong Kong an hneh hma hian Chinese Taipei (4-0) leh Singapore (3-1) an lo hneh tawh bawk.

Nimina match tawp berah hian Bekey Oram chuan goal hnih a khung a, Rohit Danu leh Lalrokima ten goal khat ve ve an khung bawk. India U16 hian March 28-a tournament dang khel turin Spain an pan lehnghal ang.

India U16 team-ah hian Mizo rawlthar pali Serchhip goalkeeper Lalbiakhlua Jongte, Serchhip midfielder Eric Remruatpuia Chhangte, Lunglei midfielder Lalrokima leh Armed Veng rawlthar Lalchhanhima Sailo te an tel a ni.