Lingard-a'n ram tan goal a khung

England tan match kua a khelhnaah Jesse Lingard chuan a goal hmasa ber a khung ta. Manchester United midfielder hian Netherlands lakah goal awmchhun khungin an ram hi 1-0 in hnehna a chanpui.

Zirtawpni zan Amsterdam-a inkhelah Dutch player ball kawih per chhuak chu box pawn aṭangin Lingard-a'n a pet lut, keeper Jeroen Zoet chuan kawih fuh mah se a dang zo lo. Gareth Southgate-a naute hi match sarih chhung chu tlawm loin an kaltluang tawh.

Everton goalkeeper Jordan Pickford-a'n a hna a thawk ṭha a, manager thar Ronald Koeman kaihhruaina hnuaia khel Netherlands lamin a chhan letna an nei lo.

World Cup khel tura inbuatsaih mek England hian Thawhlehni zan hian Italy chu friendly match khel turin an mikhual dawn a, Netherlands hian Portugal an lenchilh ve thung ang.