Salah ropuina hliahkhuhtu Ronaldo

International friendly match-ah tun hnai Europe-a player langsar pahnih Cristiano Ronaldo leh Mohamed Salah an intawng a, inkhel ngaihven hlawhah a tawpa hming langsar zawk chu Ronaldo a ni.

Portugal hian friendly match-ah Egypt an mikhual a, Salah-a'n mikhual team tan hmahruaina goal a khung. Egypt-in Salah hoin hnehna an chang tawh mai dawn nia a lan hnuah Ronaldo a inlar a, Real Madrid forward hian hun pek belhah goal hnih khungin European champion hi hnehna a chanpui.

Inkhel ngaihven hlawh dangah Germany leh Spain chu goal khat ve ve khungin an inhnehtawk a, Neymar tel lohna Brazil-in 3-0 a Russia an sawp laiin Davide Astori hriatrengna hun hman zanah Italy chuan 2-0 in Argentina an ngam lo bawk.

Ronaldo 2 Salah 1
Portugal leh Egypt inkhel first half-a hmuhnawm tawk lo a, mipuiin an beisei ang inkhel an hmu lo. Mahse, minute 56-naah Salah-a'n a ke hman thiam vei lam hmangin ṭha zetin a khung a, Ronaldo ṭantute an reh.

Pharaohs (Egypt sawina)-in hnehna an chang ngei dawn nia a lan hnu hun pek belhah Ronaldo-a'n vawi hnih a tauh lut a, Salah hming faktute ngawih tirin an awm nghal. Ro­naldo-a'n ram tan match 148-a khelhah goal 81 a khung tling ta a, ram tana goal khung tam lamah Ferenc Puskas (84, Hungary) leh Ali Daei (109, Iran) chiah a tluk tawh lo.

Ronaldo-a'n ram leh club tan a match hnuhnung pakua aṭangin goal 19 a khung tawh a, tun season-ah match 40 aṭangin goal 43 a khung tawh! Portugal coach Fernando Santos chuan, "Ronaldo chu hei hi a ni a, amah hi goal chu a ni," tiin a player a fak.

Spain = Germany
Kum 2010 World Cup champion Spain leh champion lai Germany inkhelah goal khat ve ve khungin an inhnehtawk a, Euro 2016 hnuah team pahnih hi an la tlawm miah lo.

Spain tan Valencia striker Rodrigo chuan minute rukna lekah goal hmahruai a khung mah se Thomas Muller chuan minute 35-naah an si phurh sutin goal dang a lut tawh lo - Bayern Munich forward-in ram tan goal 38 a khung tawh a, goal a khungna inkhelah Germany an la tlawm ngai lo.

Germany tan Mats Hum­mels chuan bar a tauh per bak­ah Spain keeper David de Gea chuan Julian Draxler-a chance neih a dang bawk a, Germany keeper Marc-Andre ter Stegen-a'n Isco chance neih a hlawhchham tir bawk.

Mangṭha Astori
Argentina leh Italy inkhelah Azzurri-in Fiorentina captain Davide Astori hriatreng nan an kawr hmaah "Davide kan hnenah i awm reng" tih chuanna kawr an ha a, March 4-a thi Italy tana vawi 14 inlan tawh hriatreng nan inkhelh hmain ngawi rengin hun hman a ni bawk.

Mahse, World Cup khel lo tur Italy-in an ṭhianpa hriatrengna hun an hman zanah Lionel Messi tel lohna Argentina an ngam lo a, bench lama Barca forward ṭhut tluan tirna inkhelah hian Ever Banega leh Manuel Lanzini ten chakna goal an khung.

Italy tan hian captain Gian­luigi Buffon a inlan bawk a, Juventus keeper hi international football chawlh­san tawh tura ngaih ni mah se Buffon chuan a ṭhianpa Astori hriatreng nana Italy kawr chu ha leh a nih thu a sawi.

Brazil = goal
World champion nih tum Brazil-in hliam vangin an thiampuipa Neymar chhawr thei lo mah se World Cup thlengtu tur Russia lakah goal khung turin harsatna an tawh phah lo a, 3-0 in hnehna an chang.

Brazil hian first half aṭang­in inkhel thunun mah se Russia goal net zawng hmu tur erawhin second half an nghah thlen a ngai a, minute 53-naah Inter Milan defender Miranda chuan Russian goalkeeper Igor Akinfeev ball dan per lehlam chu goal-ah a chantir.

Minute 62-na a ni a, Cou­tin­ho hun a inher chhuak. Bar­celona midfielder hian Alek­sandr Golovin-a'n Paulin­ho a pawh thluk avanga an penalty hlawhchhuah chu goal-ah a chantir a, vengtu nei lo Paulinho chuan an goal thumna a khung ve leh bawk - Brazl hian match riat chhung chu tlawm hmel an hmu tawh lo.