TNT leh Durtlang North an chak

RS Traders Pro Volleyball League 2018 khelh mekah TNT chuan an match hmasa ber atan Anastasia, Electric Veng an hneh a, kai thar pahnih inkhelah Durtlang North chuan Tuichangral lakah hnehna an chang ve bawk.

Zirtawpni zan R. Dengṭhuama Indoor Stadium, Mualpuia inkhelah TNT hian 25-16, 25-22, 25-18 in Anastasia an hneh. PVL hmasa ber final-ah Anastasia hian TNT hnehin nomawi an chawi a, an intawn lehna hmasa berah TNT lamin phuba an la ve thung.

Season hmasa khan TNT-in 7ft 2in-a sang Jatin Singh lalutin final an lut zo lo a, kuminah Laldensanga chu Anastasia lakah an chân bawk. Tun ṭumah hian Mizo player hlangin an khel a, an innghahna chu thawhhona ṭha a ni.

Inrinni zanah kai thar pahnih in­khelin, Durtlang North chuan Tui­chang­ral 25-20, 38-36, 25-17 in an hneh. Tuichangral hian set la thei turin 18-13 leh 20-17 in hma an hruai hman. Mahse, hun pawimawhah MVA hnuaia inelna lian dang hmachhawn fo tawh Durtlang North-in an tawnhriat neih ṭhat an chhawr ṭangkai a, an pawtthla.

PVL league round hmasa ber khelh zawh a ni a, Durtlang North bakah champion tura rinkai Hunthar leh TNT ten point thum an hmu. PVL hi Thawhlehni zanah khelh chhunzawm a ni dawn a, Durtlang North leh ITI veng an inkhel ang.