MBA Official Tourney khelh zawh a ni ta
Mizoram Badminton Association hnuaia Tournament hlun ber RFL-PLASTICS 33rd MBA Official Badminton Championship chu Inrinni khan Kulikawn Indoor Stadium-ah khelh zawh a ni.
Men's singles-ah Mizoram Police BC player pahnihin inkhelin Samuel Lalnunmawia'n Mizo shuttler zinga sulhnu nei ṭha ber Lalmuanawma hnehin pakhatna a ni.
Inelna kalhmang
March 19 aṭanga khelh ṭan MBBA hnuaia inelna MBA Official Tourney hi season khar nana khelh a nih avangin Season Ending Tournament tih a ni bawk. Open Tournament niin a duh apiang tan tel theih a ni a, doubles-ah pawh club inang kher ṭan kawp a ngai lo a, category 17 zet a awm.
Open inelnaah hian club leh district badminton association belhkhawmin 35 an tel a ni.
Team Inelna
MBA Official Tourney rual hian team inelna 17th Inter District Team Championship chu khelh a ni bawk a, category pariatah inelna hi neih a ni. Saron BC chu category pali an telna under 19 girls, women's, men's leh 35+ men's-ah te an chak vek a, overall team champion an ni.
Team inelnaah hian club leh district badminton association belhkhawmin 26 an tel a, Saron BC champion lohna category dang paliah hian U16 Girls-ah Mission Veng BC, U19 Boys-ah SYS, U15 Boys-ah Lalat BC leh 45+ Men's-ah Mizoram Police te an chak.