Vettel a chak hmasa ber

Car intlansiakna sang leh ngaihhlut ber Formula 1 season thar chu nimin khan tlan ṭan a ni leh ta a, intlansiak hmasa ber Australian Grand Prix-ah Sebastian Vettel chu pakhatna a ni. Ferrari driver hnungah hian champion lai Lewis Hamilton leh Vettel-a teammate Kimi Raikkonen te an thleng thung.

Melbourne Grand Prix Circuit-ah lap 58 an tlan chhungin Vettel hi a tlan tluang ṭha ber a, Formula 1 intlansiak bika a vawi 48 chakna ni tur hian amah elphaktu a nei meuh lo. German tlangval hi dawhsan (podium) ah vawi 100 a lawn tling ta chiah, legend Michael Schumacher, Alain Prost leh Hamilton te nen huang khatah an awm.

Mercedes driver Hamilton-a'n qualifier a tlan ṭha a, mahse nikum ang bawkin Vettel a tluk lo nawn. Melbourne-ah hian pole positon aṭanga bul ṭanin kawng kawi hmasa berah a hmahruaina a siam fal hret thei. Mahse, kawi thumnaah Ferrari driver Kimi Raikkonen-a'n na taka nawrin intlansiak boruak a ti nung zual a, boruak sang tak karah Vettel chu chak taka tlanin a vawi thum nan Australian GP-ah a dinchan phah thung.

Vettel leh Hamilton te hi vawi li world champion ni tawh an ni a, an elpui driver dangten an tluk lo hle. Season hmasa pawh khan Asia lama inelna an neih hma chuan an inel tawk hle a, a hnu lamah erawh Mercedes an chunghnung thung. Kuminah pawh inel leh ber tur an ni ang.

Kum 30 mi Vettel chuan, "Kan duh hmun kan thleng, mahse hna a la zo lo. Hmasawnna tur a la awm a, theihtawp kan chhuah chhunzawm ang," a ti. Season hmasa khan Vettel hian intlansiak pangaah hnehna a chang a, season chawhnu lamah an team an talbuai avangin Mercedes an tluk lo.

Ferrari leh Mercedes te elphak deuh ber tura ngaih Red Bull pawhin season bul an ṭan chhe lo. Daniel Ricciardo leh Max Verstappen te chu palina leh parukna an ni, an pahnih inkarah hian vawi hnih champion tawh Fernando Alonso a thleng. McLaren driver hian inelna neih hmain team lian dangte an elphak a rin loh thu sawi mah se, intlansiak takah a theihna a lantir a, driver dang tana ngaimawh theih tur tak a ni ang.