Thuama'n FC Goa a zawm

Mizo goalkeeper Lalthuammawia Ralte chuan Bengaluru FC chhuahsanin FC Goa a zawm. Champhai tlangval-in Goa lam a pan tur thu hi Indian media ṭhenkhatin hma takah tarlang mah se hetihlai hian Thuama'n thutlukna a la siam lo a, Bengaluru lamin an keeper hi chelh tumin hma an la ve bawk.

Mahse, Inrinni khan Thuama hian Vanglaini hnenah Goa lam pan tura thutlukna a siam thu tichiang ve chiahin, Shillong Lajong aṭanga a professional career ṭantu goalkeeper chuan, "Season hnih chhung khel turin contract ka ziak," a ti a, ISL season thar aṭang chuan Goan club tan si ban a nghak tawh dawn.

Thuama hian season thum chhung Shillong Lajong-ah hun a hman hnuin Bengaluru a pan a, Bangalore club-ah season thum hun a hman chhungin I League nomawi pahnih leh Federation Cup a chawi.

Nipui lai ISL draft-ah khan Bengaluru FC leh Pune City-in inchuh mah se Bangalore club-in nuai 37.5-in an chang a, mahse Gurpreet Singh Sandhu awm vangin league match hnih chiah inlanin AFC Cup-ah captain a ni thung a, FC Goa-ah hian first choice keeper ni tura beisei a ni.