Japan tlangval tan Djokovic a khauh lua

Novak Djokovic chuan a zawnin match 17 chhung zet chu Kei Nishikori a hneh ta! Japan tlangval Nishikori tan world number 1 hi a awmkhauh lua hret a, match tir lamah khel ṭha viau mah se set hnihna aṭangin kawng engkimah Djokovic a chungnung.

Pathianni zing Flushing Meadows, New York-a inkhelah seeded pakhatna Djokovic hian 6-7 (4-7), 6-3, 6-3, 6-2 in hnehna a chang a, chak tur hian darkar thum leh minute 32 a hmang a, a vawi 14 nan US Open fourth round a lut.

A awlsam lo
Season hmasa US Open-ah khan Djokovic hi a hmingchhia a, hnawl a ni. Kuminah a mualphona hliahkhuh tumin thapui a thawh a; Arthur Ashe Stadium chhunga inkhel entu tam zawk erawhin Nishikori an ṭan zawk.

Kum 2014 US Open finalist Nishikori-a'n set hmasa ber a lak lai phei chuan thawm a ṭha hle. Set hnihnaah erawh Djokovic-a'n a khelh dan phung a thlang a, pawng tawng nawr ngawt loin amah a inveng a, a tawpah a dawhtheih rah a seng.

Serbian tlangval Djokovic chuan, "Inkhel ropui leh hautak a ni chiang hle. Kei-a inkhel kha ngun taka in lo en a nih chuan tennis level sang tak a khel tih inhmu ang, khatiang hmachhawn kha chu engtik lai mahin a awlsam ngai lo.

"Ka khingpui khan fak a phu, chutih rualin chak thei tura ka khel chhuak erawh ka lawm hle. A tir lamah talbuai deuh mah ila rei vak lo hnuah ka insiamṭha thei," tiin a sawi, a match lehpekah chuan Jenson Brooksby hnehtu Aslan Karatsev a hmachhawn leh ang.

Season kal laiah Djokovic hian - Australian Open, French Open leh Wimbledon title a la vek, US Open-ah a champion leh thei a nih chuan Open Era chinah Rod Laver (1969) hnua 'Calendar Grand Slam' ni leh thei hmasa a ni dawn.

Tsitsipas a tla
Champion tura rinkai zinga mi Stefanos Tsitsipas chu third round paltlang zo loin a tla. Greek tlangval hi Spanish rawlthar Carlos Alcaraz lakah 6-3, 4-6, 7-6 (7-2), 0-6, 7-6 (7-5) in a chak lo a, inelna a hmachhawn danin sawi zui a hlawh.

Seeded pathumna Tsitsipas hian a match hmasa pahnihah 'toilet break' a nei ve ve a, world number 1 hlui Andy Murray phei chuan na takin a sawisel. Third round match an khelh lai pawhin toilet break a nei leh a, mahse a chak phah thei ta lo.

Kum 23 mi Tsitsipas chuan, "Infiammi dangte ang bawkin toilet break ka la a ni mai a, thil mak leh sawisel tur awmin ka hre hran lo. Midang aiin hun ka hmang rei deuh a ni mai thei, chutiang a nih chuan dan angin min hrem thei, mahse chutiang erawh a ni si lo," tiin a sawi.

Second round-a toilet break a nei let leh lam chu inkhel entu lamin an lo au el hial a, tennis huangah chuan hetiang thil hi a thleng ngai meuh lo. Theihna neih san ringawt a tawk lo a, khingpuite zah leh nungchang mawi neih tel a pawimawh tih a lang.

Tsitsipas chuan, "Player dangte pawhin dan bawhchhiat chang an nei, fans lamin an haw zui ngai kher pawhin ka hre lo. Chawlh hrang hrang zinga pakhat ka la ve a ni mai a, mi zawng zawngin min dem nghal vek mai kha chu hriatthiam a har," tiin a insawifiah.

Zverev leh Medvedev
Novak Djokovic el phak tura ngaih Daniil Medvedev leh Alexander Zverev te pawhin an khingpui ve ve hnehin fourth round an lut ve bawk a, anni pahnih hi Djokovic-a'n Grand Slam nomawi pali a kawl khawm tur dan tum ngam zinga mi an ni.

World number 2 Medvedev-a'n darkar hnih pawh tling loah world number 72 Pablo Andujar chu 6-0, 6-4, 6-3 in a sawp. Russian star hi hard court-a inkhel thiam a nihna a lang chiang a, hah lutuk loa a tlang thei hi a la ṭangkai ang - British number 1 Dan Evans nen an inkhel leh ang.

Olympic champion Zverev-a'n fiahna a hmachhawn a, set hmasa a hloh hnuah Jack Sock chu 3-6, 6-2, 6-3, 2-1 in a hneh; set lina an khelh lai hian tualchhung player hi a malpui a hliam a, a inkhelh zui theih loh avangin Zverev a chak.

German tlangval Zverev hian a vawi khat nan Grand Slam title a beisei mek a, quarterfinal thleng tur chuan Jannik Sinner a hneh leh a ngai dawn. Seeded 13-na Sinner hian Gael Monfils chu 7-6 (7-1), 6-2, 4-6, 4-6, 6-4 in a lo hneh ve thung a ni.

Inkhel dangah Lloyd Harris leh Reilly Opelka ten hnehna an chang a, qualifying aṭanga in vaw kai Oscar Otte pawhin a zinkawng ngaihnawm a la chhawm nung - world number 114 Otte hian amah aia player ṭha leh tawnhriat nei hnem zawk Andrea Seppi chu 6-3, 6-4, 2-6, 7-5 in a hneh.