Edu-a'n an bazar dan a sawifiah

Arsenal technical director Edu chuan nipui bazara an sum hman dan chu ho lam mai a nih loh thu a sawi a, an player lei tharte an khelh-ho theih hun lo nghak hram turin a ngen a, chumi hnuah an nihna tak a lan tur thu a sawi bawk.

Gunners hian nipui bazarah player lei nan pound maktaduai 150 chuang an hmang - Premier League club zinga sum hmang hnem ber an ni. Mahse, Mikel Arteta naute hian league match thum an khel tawh a, an tlawm vek.

Champion lai Manchester City leh Champions League champion lai Chelsea an ngam lo chu thuhran, kaithar Brentford lakah pawh an tlawm. Brentford hi chu season hmasa Championship champion mai an ni si.

Edu chuan, "Pawisa chauh ni loin kan ruahmanna leh chet vel dan hi chhut tel a ngai. Player paruk kan lalut a, kum 23 hnuai lam an nih avangin nakin zel atan team din kan tum tih a chiang.

"Season hmasa aṭang khan tuna kan squad hi kan hmang ṭan ang a ni a, rualkhai taka an khelh theih hun nghah a ngai. A bulṭhut fuh a ngai a, chumi hnuah squad inkhairual tak neih a pawimawh leh ang," a ti a, season tawpa an dinhmun a san theih nan squad ṭha a pawimawh thu a sawi bawk.

Arsenal hian kum 1995 hnua a vawi khat nan European football an khel dawn lo, indinthar tumin hma an la mek. An player thar - Albert Sambi Lokonga, Martin Odegaard, Aaron Rams-dale, Nuno Tavares leh Takehiro Tomiyasu te hi eng ang tak nge an nih chu hunin a la hril ang.

September 11, Inrinni zanah Gunners hian Norwich City an mikhual dawn a, season kal laia a vawi khat nan point hmuh an beisei dawn.