National boxing C'ship-a Mizoram aiawh turte an inpuahchah mek

Boxing Federation of India (BFI) chuan September 15-22, 2021 chhung hian Inspire Institute of Sport, Karnataka-ah 5th Elite Men's National Boxing Championship an buatsaih dawn. Mizoram Boxing Association (MIZBA) chuan Mizoram aiawha tel tur mipa boxer panga a thlang chhuak a, tunah hian MIZBA Boxing Hall, Ramhlunah training an nei mek.

Mizoram aiawh tura thlanchhuahte chu Lallawmawma (57kg), Zomuansanga (67kg), Zochhuanawma (71kg), Malsawmtluanga (75kg) leh C. Lalduhawma (81kg) te an ni a, Centre of Excellence (SYS) head coach R. Lalchhuanawma'n (Sete) a hruai ang.

Mizoram boxing coach Sete-a chuan, "Selection-ah boxer ṭhahnem tak an rawn kal a, boxer beiseiawm ṭhahnem tak zingah ṭha bik panga chauh kan thlang. Boxer thlanchhuahte hi physical fitness pawh nei ṭha sa an ni a, beisei pawh kan nei sang hle," tiin Vanglaini a hrilh.

National boxing-ah hian Mizo boxer zingah gold medal la an la awm lo. Hemi chungchang hi sawiin Sete-a chuan, "Senior inelnaah hian medal la an la awm lo a, Pathian zarah kan vanneih ṭumte pawh a inher chhuak ve turah ka ngai. MIZBA-in min vil hneh a, min duat a, kan mamawh engkim min tihsak vek avangin an chungah kan lawm hle," tiin a sawi.

Tun ṭum National Boxing Championship-ah hian category 13 a awm a, Mizoram hi category pangaah an tel dawn. 57kg category-a tel tur Tuipui tlangval Lallawmawma hi National School Games gold medalist a nih bakah Youth National-ah bronze medal a la tawh a, tun ṭum hi senior inelnaa a vawi khat telna tur a ni.

Republic Veng boxer Zochhuanawma Fanai (71kg) hian North East boxing inelnaah gold medal a la tawh a, Khatla South tlangval Zomuansanga Thangluah (67 kg) pawhin boxing hmanga hmarchhak inelnaah hian silver medal a la ve tawh bawk.

Lunglei boxer Malsawm-tluanga hi National Sub Junior leh National School Games-ah bronze medal a la tawh a, boxing thiam vangin Army-ah lut tawhin tun ṭum hi senior inelna a vawi khat hmachhawnna tur a ni.

Durtlang Leitan tlangval Lalduhawma hi tun ṭum inelnaa senior ber a ni a, National junior-ah gold medal a la tawh a, LPS Pro Fight middleweight champion lai a ni bawk.