Ukraine-in chak thei lo France an chelh!

World champion France an chak thei lo - Inrinni zan khan khualmualah Ukraine nen 1-1 in an inhnehtawk a, a zawnin match nga chu an khingpui nen an inhnehtawk tawh. An chak thei lo!

Ukraine tan Mykola Shaparenko chuan goal hmahruai a khung a, Euro 2020-a inlan lo Anthony Martial chuan ram tana a goal hnihna khungin si phurh a sut.

Euro 2020 group stage-a an match hmasa berah khan France hian 1-0 in Germany an hneh a, a hnuah an khingpui apiang inhnehtawkpuiin an chak leh tawh lo. France tan inenfiah a ngai.

Tun international break-a an match hmasa berah pawh France hian 1-1 in Bosnia-Herzegovina an inhnehtawkpui a, Inrinni zanah thawnthu an thlak danglam thei lo.

Barakhaih
Ukraine-in an match hmasa zawkah team narana ngaih Kazakhstan an lenchilh a, group D mawngphah luahtu team lakah hian awlsam taka chak tura ngaih ni mah se 2-2 in an inhnehtawk.

Kazakhstan laka hnehna chang zo lo Ukraine hi France laka point hlawh chhuak tura beisei an harsa a, mahse, France-in beisei an phak bik miau loh avangin point khatah team pahnihin lungawi an zir.

Mualneitu Ukraine hian goal an khung hmasa zawk hial. Mykola Shaparenko chuan goal chung kil sirah yard 20 vela hla aṭangin a thlawh lut a, a goal khung hi minute 44-naa lut a ni.

Ukraine-in goal an khung aṭanga rei lo têah chawlhlawk hman a ni zui a, France tan second half ṭan a nih hmaa si phurh sut turin hun a awm lo.

Martial-a goal
Minute 50-naah France tan Anthony Martial chuan si phurh a rawn sut a, Les Bleus tana goal hnih a khungna ve chauh a ni - ram tan match 29 a khel tawh.

Manchester United forward hian kum 2016 hnuah khan ram tan goal a khung leh tawh lo a, France tana a goal hnihna khung tur hian a nghak rei hle.

France-in si phurh sut hma viau mah se goal dang erawh an khung chhunzawm lo a, vawi 16 zet 'shot' nei mah se heng zinga panga chiah hi target-ah a kal avangin goal hmaah France an hriam tawk lo tiin a sawi theih.

Les Bleus tan Moussa Diaby chuan chakna goal khungna hun ṭha a nei a, mahse, Bayer Leverkusen winger hian ram tana a goal hmasa ber khungna remchang a neihah Karim Benzema ball pek chu 'post' tih per nan a hmang.

A tawpah chuan...
France-in an match hnuhnung pahnihah hnehna an chan zawh loh avangin match nga aṭangin point kua chiah an nei a, an hnuai chiaha awm Finland-in point nga an nei mek.

Mahse, Finland hian match hnihin an khel tlem zawk tih hriat tel a ṭha a, match nga tho khel ve tawh Ukraine-in point nga tho an nei ve bawk.

Finland hian Inrinni zan inkhel dangah 1-0 in Kazakhstan an hneh a, Joel Pohjanpalo chuan minute 60-naah inkhela goal awmchhun hi a khung.

Thawhlehni zan dar 12:15-ah France nen an inkhel dawn a, France-in hma hruai fal turin hnehna chan an mamawh - Les Bleus-in inrintawkna nei let turin chak an mamawh.