Koeman tan champion a ngai

Barcelona chuan an coach Ronald Koeman chu contract thar a hlawhchhuah theihna turin tih tur pakhat an tuksak a, chu chu La Liga nomawi chawi a ni - a awlsam dawn lo.

Dutch coach hian June 30, 2022 thleng Nou Camp-a cham turin contract a nei a, La Liga nomawi chawi bakah Catalan club hian contract thar hlawh turin thil dang pahnih tih tur an tuk bawk.

Barcelona chuan tun hma angin an academy chhuak player-te khelmuala an inkhelh tam an duh a, Koeman hi La Masia chhuak player chhawr tam turin an ti.

Dutch coach hian kum 18 mi Yusuf Demir, midfielder Gavi (17) leh midfielder Nico Gonzalez (19) te chu tun season-ah Barca senior team tana an match hmasa ber a khelhtir der tawh.

Austrian winger Demir hi Austrian club Rapid Wien aṭanga loan hmanga an hawh a ni a, season tawpah an duh chuan euro maktaduai 10-in an lalut thei ang - loan-a hawh manah hian €500,000 chu Rapid Wien hi an pe.

Gavi erawh Real Betis youth team tana goal 96-a khung hnuah kum 2015 khan kum 11 mi lek niin Barca a zawm a, Nico pawh Barcelona academy aṭanga inzir chhuak a ni.

Barca hian an team khelh ṭhin dan 'attacking game' dik tak hmuh leh an duh nia sawi a ni bawk a, Barca ngaihtuahin an thil phut hi harsa lo angin lang mah se tun season-a Barca team en chuan a harsa mai thei.

Catalan club hian nipui transfer-ah player 11 ngawt an chhuahtir a, an chhuahtir zingah hian Lionel Messi leh Antoine Griezmann te an tel a, Koeman-a'n tlarhmaa duhthlan tur a neih hi Memphis Depay, Ousmane Dembélé, Martin Braithwaite, Ansu Fati leh Sergio Agüero (inhliam) te an ni!

Chutihrual chuan Catalan club hian an sum dinhmun chinfel hna an thawh mek avangin Koeman hi hriatthiamna thuk tak an nei nia sawi a ni a, contract thar hlawh tura tih tur an tuksak zingah Champions League nomawi chawi a tel lo.