Darren Till tan beisei a bo

English fighter Darren Till-a'n UFC middleweight champion Israel Adesanya hmachhawn a beiseina chu a thamral a, nimin khan UFC Fight Night-ah Derek Brunson chu round thumna lekah submission (rear-naked choke) hmangin a ngam lo.

Liverpool tlangval, kum 28 mi Till hian bul ṭan ṭha viau mah se fight a rei hnuah Brunson-a chungnunna a lang a, a tawpah a tlawm - vawi 23 fight-a hmachhawn vawi li a tlawmna a ni a, a fight hnuhnung pangaah vawi khat chiah a chak!

Kum 37 mi Brunson chuan title fight nei tura a inpeih thu a sawi a, MMA fighter ṭha huangah a awm thu a sawi. American fighter chuan, "Ka hming lam a ni ve ngai lo hi ka ning takzet a ni," a ti a, MMA fighter langsar hmachhawn turin a inpeih.

Brunson chuan, "Izzy Adesanya leh Robert Whittaker te an inhmachhawn dawn tih ka hria a, mahse, dawhthei takin ka lo nghak ang.

"Hetih chhung hian fight panga emaw paruk emaw ka lo nei thei ang a, hun rei tak ka lo nghah tawh title fight ka nei thei ang," a ti a, title fight neih ngei a duh thu a sawi.

Nimin fight ngaihven hlawhzual zingah a vawi khat nana UFC-a inlan Paddy Pimblett chuan a thutiam a tihlawhtling a, Liverpool tlangval hian Luigi Vendramini chu technical knockout hmangin round khatna lekah a hneh.