Netherlands lungdamna Memphis Depay

Memphis Depay-a'n innghahna tlak a nihzia a pholan chhunzawm zel a, Netherlands tan Inrinni zan khan goal hnih a khung.

World Cup qualifier inkhelah Netherlands hian 4-0 in Montenegro an sawp a, Giorginio Wijnaldum leh Cody Gakpo ten goal khat ve ve an thawh ve bawk.

Netherlands boss Louis van Gaal-a'n an ram team a enkawl vawi thumnaa an match hmasa berah Norway lakah a team a chakpui zo lo a, 1-1 in an inhnehtawk.

Inrinni zanah erawh thawn-thu thlak danglamin a awm a, chiang takin Netherlands an chak - an elpui ber Turkey-in 3-0 in Gibraltar an hneh a, Norway-in 2-0 in Latvia an hneh bawk.

Duhaisam
Louis van Gaal-a'n Netherlands coach atana ruat nawn a nihin an ram team enkawl tura coach ṭha ber a nih thu a sawi a, Dutch FA chuan pan tur dik tak an pan thu a sawi - mahse, match hmasa berah Norway nen an inhnehtawk.

Dutch coach, pa ṭawngtam ve tak tan a thusawi um phak turin a match hnihnaah chak a ṭul a, minute 38-naah Depay chuan a pu lawmna a siam nghal. Montenegro defensive midfielder Dušan Lagator chuan kum 27 mi Depay a ti tlu a, penalty a chawi.

Lionel Messi chhuah hnua Barcelona fan-te beiseina Depay chu penalty pet tur hian a lo pen chhuak a, harsatna nei loin goal-ah a chantir - goal dang erawh a lut lawk lo.

Chawlhlawk hman zawh hnu, minute 62-naah Depay hian an goal hnihna a khung a, tun season-ah ram leh club tan match nga khelin goal li a khung tling leh der tawh - ram tana a match hnuhnung pakuaah goal kua a khung!

Rawlthar duhawm
Depay-a goal khung aṭangin minute riat a liam a, club football-a goal khung uar lo tak Giorginio Wijnaldum chuan ram tan innghahna tlak a ni tih pholangin an goal thumna a khung a, Netherlands tan match 81-a khelhah goal 26 a khung tawh.

Netherlands-in goal an khung laklawh a, insum an tum lo - Wijnaldum goal khung aṭanga minute ruk liam hnuah Cody Gakpo chuan goal mawi bik a khung a, 4-0 in an chak.

Kum 22 mi Gakpo-a'n ram tana goal a khung hmasak ber a ni a, ram tan match thum a khelhna chiah a ni bawk. Goal a khungna khelmual hi Philips Stadion a ni a, a club khelhna PSV Eindhoven khelmual a ni.

Montenegro-in 28% chiah ball chang chungin chance an nei ve tho a, mahse, an hun ṭha neih an chhawr lo - Stefan Mugosa chuan Netherlands tana a match hmasa ber kheltu Tyrell Malacia-a chetsual zarah chance a nei a, mahse holam takin a hlah.

Tun leh hmabak
Netherlands-in hnehna an chan avangin match ngaah point 10 an nei ta a, an chung chiahah hian match nga khelh aṭanga point 11 nei Turkey an awm a, Norway-in point 10 an nei ve mek bawk.

Turkey hian khualmualah 3-0 in Gibraltar an hneh a, mikhual team tan Halil Devisoglu, Hakan Çalhanoglu leh Kenan Karaman ten goal khat ṭheuh an khung a, Gibraltar lamin a chhanletna tur an nei lo.

Thawhlehni zan dar 12:15-ah Turkey hian Netherlands an lenchilh zui dawn a, team pahnih inkarah point khat chiah a awm avangin inkhel boruak a san loh ring suh.

UEFA hnuaia World Cup qualifier-ah group G hi ngaihnawm ber pawl a tling - palina Montenegro pawhin point sarih an nei tawh a, pakhatna nena an inthlauhna hi point li chauh a nih avangin beisei a la bo lo.