Barty hnehtu Shelby Rogers

US Open khelh laiah hmeichhe world number 1 Ashleigh Barty a chak lo. Australian star hi tualchhung nula Shelby Rogers lakah 6-2, 1-6, 7-6 (7-5) a chak loin third round a paltlang zo lo a ni.

Wimbledon champion Barty hi chak tura rinkai zawk a ni a, set khat ve ve an lak hnuah set thumna an khel. Set hnuhnung berah hian 5-2 in hma a hruai fal hman a, dinhmun ṭha taka a din hnuah Barty a ṭang zui thei lo.

Chak lo Barty chuan, "Hun ṭha ka hmu hnem, mahse ka puitlin thei tlat si lo. A bik takin ka service kha la thlang thei ni ila thil engkim mai kha a awlsam tur a ni a, amaherawhchu hetiang vanduai ni hi chu a thleng ve ṭhin," tiin a sawi.

World number 43 Rogers hian a match lehpekah chuan Emma Raducanu a hmachhawn dawn. British tleirawl hian inkhel dangah world number 41 Sorribes Tormo chu 6-0, 6-1 in a lo sawp ve thung a ni.

Hmeichhe singles inkhel dangah 2019 champion Bianca Andreescu chuan darkar khat leh minute sarih chhung lekin Greet Minnen chu 6-1, 6-2 in a hneh. Canadian nula hian New York khawpuia inelnaah hian a zawnin match 10 hnehna a chang ta.

Petra Kvitova erawh Maria Sakkari lakah 6-4, 6-3 in a chak lo, seeded 10-na hian unforced errors vawi 34 ngawt a neih laiin winners ṭum 16 chauh a vaw chhuak thei a, tihsual a nei hnem lutuk chu a tawpah a tuar.

Wimbledon finalist Karolina Pliskova, Olympic gold medallist Belinda Bencic leh season hmasa French Open champion Iga Swiatek te pawhin an khingpui ṭheuh hnehin fourth round an lut ve bawk.