Haaland-a'n goal a khung zel

Erling Braut Haaland-a'n goal khung a ṭhulh thei lo - tlin takin ram leh club tan a hna a thawk zel a, Inrinni zanah pawh Norway tan World Cup qualifier-ah goal a khung.

Norway hian Latvia chu khualmualah 2-0 in an hneh a, Haaland bakah hian Mohamed Elyounoussi chuan goal khat a khung ve bawk - Latvia lamin a chhanletna tur an nei lo.

Haaland-a goal khung hi penalty aṭanga a chhuih luh a ni a, kum 21 mi striker-in ram tan match 14-a khelha goal kua a khungna chiah a ni. Netherlands laka goal a khung tawh bawk avangin tun international break-a match hnih a khelh aṭangin goal hnih a khung tawh.

Borussia Dortmund striker hian tun season inelnaah match nga khelin goal ruk a khung leh der tawh a, season hmasa khan inelna hrang hrangah match 41 khelin goal 41 a khung.

Norway-in match nga an khelh aṭangin point 10 an nei ta a, Thawhlehni zan dar 12:15-ah Gibraltar an mikhual dawn - hnehna chang ngei tura beisei an ni a, an chunga awm Netherlands leh Turkey an inkhelh dawn bawk avangin Gibraltar an hneh chuan table-ah pahnihna chin chunglamah an chho nghal ang.