An ramah Max Verstappen a chak

Entu mipui 65,000 chuang zet chu serthlum rawng (orange) in an inchei a, tualchhung tlangval Max Verstappen ṭanin an au ring hem hem hle - Dutch mipui tam tak pungkhawm hian an duh leh beisei ang ngei pawh an hmu.

Pathianni zana tlan zawh tak Dutch Grand Prix-ah a hmasa ber aṭanga tlan ṭan Verstappen a chak ber. Kum 1985 hnua a vawi khat nan Dutch mipuite hian an ramah ngei tualchhung tlangvalin hnehna a chang lai an hmu ta.

Max a chak
Kar hmasa khan Belgian GP an tlan, ruah surin nasa takin a tibuai - inelna an neih mumal theih miau loh avangin qualifying lama tlan ṭha ber Verstappen chu chaka puan a ni a, mahse point an hmuh tur ang chanve chauh an pe.

Verstappen chak dan hi Mercedes lamin pawm thiam harsa an ti, champion lai Hamilton phei chuan na takin a sawisel. Netherlands ramah inelna hmachhawn turin an zin zui a, qualifying aṭangin inelna thawm a na nghal hle.

Red Bull driver Max-a'n a hmasa ber aṭangin bul a ṭan a, a bul a ṭan fuh bawk avangin a tir aṭanga a tawp thlengin harsatna a nei lo. Tun season kal laiah inelna vawi 13 a hmachhawn tawh aṭangin ṭum sarih a chak tling ta chiah.

Driver championship lamah pawh Verstappen hian point 224.50 hmuin hma a hruai nghal a, champion lai Mercedes driver Hamilton chu pahnihnaah awmin point 221.50 a hmu thung, an inthlauhna hi point thum chauh a ni.

A changtupa
Netherlands mipuiten car intlansiak a ngaina a, ram dang mi ai chuan tualchhung mi a ngaina ang tih chu thil chiangsa a ni. A bik takin Verstappen phei chu a nungchang vangin mite ngainat hlawh a ni, 'Dutch tlangval' inti deuh ngat ṭhin a ni.

Red Bull team principal Christian Horner chuan, "Khawpui zawng zawngah kal chhuak ula, chumi hnuah intlansiakna hmun thlengin fang kual leh mah teh u, in tinah Verstappen tana puanzar (flag) in hmu ang. Hetiang ang em ema thlawpna ṭha hi tun hmain ka la hmu ngai lo.

"A tir aṭang khan engkim mai a fuh vek a, Max erawh driver puitling tak a nih avangin a chheh vel boruakin a tibuai ve lo. A hna thawh tur chauh ngun takin a ngaihtuah a, mipui thawm ring takte chu amah ti chaktu an ni," tiin a sawi.

Max chuan, "Ka lakah mipui beiseina a sang, an beisei ang ngei ka tih hlawhtlin theih avangin ka lawm takzet a ni," a ti. Kum 36 liam ta khan McLaren driver Niki Lauda chuan an ramah hian hnehna a lo chang tawh, hun rei tak hnuah Max a rawn lang leh chiah.

Chhuanlam awm lo
Mercedes F1 boss Toto Wolff chuan Dutch GP-a hnehna chang tur chuan an tan tih sual zeuh neih a thiang lo tih a sawi lawk a, an theihtawp chhuah mah se Red Bull leh Verstappen ten tih sual an neih bik loh avangin an tluk ta lo.

Hamilton chuan, "A tirah khan fal takin Verstappen kha a tlan nghal a, kan tan chuan tih theih a awm ve tawh lo. Beidawng loin a tih sual kar kan chang reng a, mah se tih sual eih pawh a nei lo," tiin an khingpui an chet ṭhat zawk thu a sawi.

Britain tlangval hian F1 world title pasarih a la tawh, record siam turin vawi khat champion a la mamawh. A lo sawi lawk tawh ang ngeiin season dang zawng aiin a awlsam dawn lo niin a lang a, champion tur chuan chet sual eih a thiang dawn lo.

Car intlansiakna sang ber hi tun season atan vawi 22 tlan tura ruahman a ni a, vawi 13 an tlan tawh. Round 14 atan September 12, Pathianni hian Monza Circuit, Monza-ah Italian Grand Prix an tlan leh ang.