Minute nga chauh an inkhel!

Argentina leh Brazil inkhel en chakin khawvelin a nghak ṭhup a, mahse minute 10 pawh an inkhel tling lo! Brazil damdawi lam thuneitute khelmualah an lut a, match khelh chhunzawm theih a ni lo a, an ti tawp chhunzawm daih.

Brazil sorkarin hripui leng vanga inkaihhruaina dan a siamah chuan, red list ram - UK, South Africa leh India aṭanga zin hawte chu ni 14 an inkhung hrang tur tih a ni. Argentina player zingah dan zawm lo an awm niah an ngai.

Corinthians Arena-a inkhelah Aston Villa goalkeeper Emiliano Martinez leh Tottenham player pahnih Cristian Romero leh Giovani Lo Celso ten bul an ṭan a, bench lamah Villa midfielder Emiliano Buendia a awm bawk.

South American Football thuneitu sang CONMEBOL chuan, "Brazil leh Argentina ten World Cup Qualifiers an khelh chu tihtawp lailawk a ni. Referee leh match commissioner ten FIFA Disciplinary Committee hnenah report an tehlut ang," an ti a, chumi hnua thutlukna siam tur a ni ang.

Argentina manager Lionel Scaloni chuan, "A lungchhiat thlak, match khelh theih a ni loh chuan inkhelh ṭan hma khan sawi awm tak a ni," a ti. Argentine Football Association chuan September 3 aṭang khan Brazil-a an awm tawh thu leh, dan leh hrai zawm ngai ang an zawm thu an sawi ve bawk.

Brazilian Football Confederation president Ednaldo Rodrigues chuan, "TV lam aṭanga inkhel en tumtute chungah ngaihdam ka dil, keini lam duh danah chuan inkhelh tur a ni, thutlukna kha a hma lama siam theih ni se ṭha tur," tiin football team lam chuan inkhelh an duh thu an sawi.