Dan theih loh Daniil Medvedev

Daniil Medvedev chuan langsar takin US Open champion a tum tih a lantir leh ta. Russian tlangval hian Pathianni zan khan Daniel Evans hnehin quarterfinal a lut a, zaninah Botic van de Zandschulp nen semifinal luh an inchuh leh ang.

Last 16 inkhel dangah Spanish rawlthar Carlos Alcaraz a la chak ve bawk. Kum 18 mi Alcaraz hian set hnih a hloh hmasak zet hnuah Peter Gojowczyk chu 5-7, 6-1, 5-7, 6-2, 6-0 in a hneh a, a vawi khat nan Grand Slam quarterfinal a lut.

Medvedev a class
Flushing Meadows, New York-a inkhelah Medvedev chuan hnehna chang turin a nghah rei a ngai lo. Darkar khat leh minute 43 chhung lekin 6-3, 6-4, 6-3 in a chak a, a service vawi khat hloh ve mah se a khingpui hi ṭum nga ngawt a chhuhsak thung.

Set hmasa berah Medvedev hian backhand tawih zet hmangin Evans-a service a chhuhsak a, 4-1 a hma hruai falin a hawi kir tawh lo. 2019 finalist hian set hnuhnung pahnihah pawh hniam lai nei loin a chak thei a ni.

Seeded pahnihna Medvedev chuan, "Duhthusama ṭhain ka khel, tunah chuan final thlen ka tum tur a ni ang," a ti. Final a luh ṭum hian Rafael Nadal a ngam lo a, tun ṭumah chuan thawnhriat a neih ṭhat tawh avangin hlawhtlin theih a inbeisei viau.

Hmabak Van de Zandschulp
World number 2 a hmachhawn tur Van de Zandschulp hi tun hma chuan mi hriat hlawh a ni lem lo. Tournamernt pawh hi qualifier paltlanga khel thei ve hram a ni a, tunah zet chuan tennis ngainatute zingah a hming inzawh nawn a ngai tawh lo ang.

World number 117 hian seeded 11-na Diego Schwartzman chu 6-3, 6-4, 5-7, 5-7, 6-1 in a hneh. US Open bikah chuan qualifier paltlanga inlan zinga mi pathum chiahin quarterfinal hi an la thleng phak ṭhin, an zinga pakhat chu Zandschulp hi a ni ta.

Tun hma chuan Zandschulp hian Grand Slam a khelh ve chinah second round pawh a la pel ngai lo. Inelna neih laiah hian a match khelh tawh zawng zawngah set la hloh vek mah se a tawpah a dingchang leh ṭhin, inrintawkna a nei sang tawh hle.

Rawlthar Alcaraz
Open Era chinah chuan Carlos Alcaraz hi US Open quarterfinal lut thei naupang ber a ni, kum 18 leh thla li mi chauh la ni mah se tun inelna neih laiah chuan player hmunnawm a ni a, kum naupan lamah hian Andre Agassi (1988) chu ni riatin a khum.

World number 55 Alcaraz hian a match lehpekah chuan Felix Auger-Aliassime a hmachhawn leh ang. Canadian player hian inkhel dangah seeded 12-na Frances Tiafoe chu 4-6, 6-2, 7-6 (8-6), 6-4 in a lo hneh ve thung.

Alcaraz chuan, "Grand Slam inelna bikah quarterfinal ka luh vawi khatna a ni a, tournament ka khelh dangte chu kar khat chhungin kan zo mai ṭhin, tunah erawh kar hnihna ka thleng ve ta, a sang thei ang ber thlen ka tum dawn," tiin a sawi.