Germany an chak nuamsa

Pathianni zan khan Germany chuan World Cup khel tur zawnnaah Armenia 6-0 in an sawp a, Hansi Flick-a hote hi group J hmahruaitu an ni.

Stuttgart-a inkhelah Germany tan Serge Gnabry (6’, 15’), Marco Reus (35’), Timo Werner (44’), Jonas Hofmann (52’) leh Karim Adeyemi (90’) ten goal an khung a, RB Salzburg forward Adeyemi hian ram tana a khelh hmasak berah goal a khung nghal.

Euro 2020 zawhah Joachim Low a chawl a, Flick-a hnuaiah Germany-in match hnih khel tawhin hnehna a chang ve ve. Chutihrualin Die Mannschaft khingpui Liechtenstein (182) leh Armenia (88) te hi FIFA ranking-ah 50 chung lama awm an nih avangin inchhuang thei an ni lo.

Bayern Munich manager hlui Flick hian Armenia nen hian Liechtenstein laka bul ṭantu player paruk a thlak a, inhliam leh damloh vang te ni bawk mah se Germany an khelh ṭhat phah hle.

Gnabry, Hofmann leh Reus ten an hun ṭha neih hmang ṭangkaiin goal an khung vek a, Goretzka pawhin goal khung lo mah se goal luh theih nan a thawhhlawk.

Bench aṭangin kum mi 18 mi pahnih Florian Wirtz leh Jamal Musiala bakah kum 19 mi Adeyemi te an lut a, German rawltharte hi an hmuhnawm hle. Injury time-ah RB Salzburg forward Adeyemi hian ṭha zetin a khung a, goal luh theih nan Wirtz a ṭangkai bawk.

Germany coach Hansi Flick chuan, "Liechtenstein lakah khan tih ṭhat ngah mah ila, tihsual pawh kan ngah. Min ṭantute lak aṭangin sawisel pawh kan dawng nasa, tunah erawh kan ṭhat dan angin kan khel a, chhunzawm zel kan tum ang," tiin an sawi.

Inkhel entute pawh Germany khelh danah an lawm a, an lawmna hi 'Mexican wave' hmangin an lantir. Flick chuan, "Khatiang kha hun rei tak kan tawng tawh loh avangin hmul thi a ding thei hial a, kan lawm hle a ni," tiin mipui chungah lawmthu a sawi.

Germany hian September 9, Nilaini zanah Iceland an hmachhawn dawn a, Reykjavik-ah hian Flick-a hote hian hnehna an chang thei a nih chuan nuam sa takin qualifier an khel chhunzawm thei ang.