Three Lions hahum ri a ring

World Cup qualifier match nga an khelhah England an la chak vek - Pathianni zan khan Andorra chu harsatna nei loin 4-0 in an sawp a, point 15 ngawt an nei ta.

Three Lions tan Jesse Lingard chuan goal hnih a khung a, Harry Kane leh Bukayo Saka ten goal khat ve ve an khung bawk. Wembley stadium-ah mikhual team-in a chhanletna tur an nei lo a, 4-0 in England an chak.

Group I inkhel dangah Poland chuan 7-1 in San Marino an sawp a, Robert Lewandowski-a'n goal hnih a khung a, Adam Buksa chuan hattrick a siam bawk. Poland leh England hi Nilaini zan dar 12:15-ah an intawng leh ang.

Albania-in 1-0 in Hungary an hneh a, Armando Broja chuan inkhela goal awmchhun hi a khung. Nilaini zan dar 12:15-a San Marino mikhual tur Albania-in beiseina an la nei ve zel.

England tan lawmna
Three Lions coach Gareth Southgate-a'n Hungary laka 4-0 ngawta chak a team aṭangin player 11 ngawt a siksawi a, hetichung hian Andorra laka chak turin harsatna an tawk lo.

England mikhual Andorra hi FIFA ranking-ah 156-na daih an nih avangin England chak hi sawi vul chuk a har mai thei a, chutihrual chuan Three Lions fak loh tawp a rem bik lo - goal li an khung miau a!

Manchester United-a tlatlum lo Jesse Lingard-a'n chance a neih phawt chuan a hlauhawm ṭhin tih a pholang nawn a, minute 18 leh 78-naah goal a khung - tun season-ah United tan match khat chiah a la khel.

Leeds United striker Patrick Bamford-a'n ram tana a match hmasa berah goal khung lo mah se Borussia Dortmund rawlthar Jude Bellingham a hmuhnawm a, kum 18 mi midfielder hian hmabak a nei êng hle.

Kane & 40
England captain Kane-a'n inkhel bul a ṭan loh avangin Jordan Henderson-a'n Three Lions tan captain armband a hreng a, minute 62-naah Bamford thlakin Kane hi luhtir a ni leh tho bawk.

Kane luh aṭanga minute 10 hnuah Andorra centre back Christian Garcia chuan Mason Mount a titlu a, Spanish fourth division club Alcorcon B team tana khel defender hian penalty a chawi.

England tan Kane a lo pen chhuak a, English striker hian harsatna nei loin goal-ah a chantir - Tottenham Hotspur striker-in goal a khung hian England goal hnihna a ni chiah a, team tenau laka goal hnih khung turin an nghak rei hle.

Kum 28 mi Kane hian ram tana goal 40-a khung tlinna chiah a ni a, nipui laia Manchester City pan tumtu striker hian ram tana heti zat goal khung tur hian match 63 khelh bak a mamawh lo.

Diriamna hnehtu Saka
Hun tawp nan minute nga chiah a awm tawh tihin Arsenal forward Bukayo Saka chuan goal khat a khung ve leh a, kum 20 mi forward hian hmanni lawka a hun tawn thim tak kha a thlirlet ang a, a thaw huai ang!

Euro 2020 final-a England-in Italy an hneh loh ṭum khan Saka hian penalty-a chak zawk zawnna inkhelah a chhuih lut lo a, hmuhsitna leh diriamna tam tak a tawk zui.

Mahse, a kum 20 tlin champhaah Saka hian amah hmusittute chunga leng a ni tih a pholang a, England tan goal a khung - a che vel apiang chu fan-ten an lawm a, Saka a nui ve leh ta.

Saka hian ram tan match 11 a khelh aṭangin goal hnih a khung ve ta a, Arsenal forward chanchin hi kan la hre chho dawn chauh niin a lang.

Poland 'hero' Buksa
Group I-a England elpui ber tura ngaih Poland-in goal khung an mamawhin Lewandowski lam an hawi ṭhin a, World Cup qualifier-a an match hnuhnung pahniha Bayern Munich striker aia langsar zawk erawh hattrick siamtu Adam Buksa a ni.

Poland tan Lewy hian goal hnih a khung ngei a, Karol Swiderski leh Karol Linetty ten goal khat ve ve an khung ve bawk - San Marino tan Nicola Nanni chuan goal khat a khung a, kum riat chhunga World Cup qualifier-a goal an khung hmasak ber record an siam!

Kum 21 mi Nanni hian match 20-a khelh tawha ram tana a goal hmasa ber a khung a, Serie C club Lucchese forward laka goal chhuah Poland-in group I-ah rorel an duh chuan an tlarhnung an ennawn a ṭul ang.

Poland tana hattrick siamtu Buksa-a'n minute 67-naah a goal hmasa ber a khung a, goal hnih dang hi hun pek belha a khung ve ve a ni - Ningani khan 4-1 a Albania an hnehna inkhelah ram tana a match hmasa ber khelin goal khat a khung a, ram tan match hnih a khelhah goal li a khung tling der tihna a ni. MLS club New England Revolution tan a khel mek.