Apuia inlan zanah India chak
Nepal-a zin chhuak India-in an match hmasa zawkah Nepal hneh zo lo mah se match hnihnaah erawh 2-1 in ṭhenawm ram hi an hneh a, international friendly match-ah hian Lalengmawia (Apuia) chuan inkhel bul a ṭan.
Kathmandu khawpuia inkhelah Nepal-in bul an ṭan ṭha a, first half-ah India aiin an hlauhawm zawk. Mahse, chawlhlawk hman hmain goal a lut lo a, chak phu zawk an awm a nih chuan Nepal-in chak an phu zawk.
Second half-ah India khel a danglam hret a, Farukh Choudhary chuan minute 62-naah goal a khung ta nge nge - Jamshedpur forward-in India tan match kua a khelha goal a khung hmasak ber a ni.
India tan captain chuai thei lo Sunil Chhetri chuan minute 80-naah a khung ve leh bawk a, Bengaluru FC striker hian ram tan match 120-a khelhah goal 75 zet a khung tling ta.
Blue Tigers-in hahdam takin an chak tawh mai dawn emaw an tih hnuah Nepal-in goal an rawn khung ve leh a, Chhetri goal khung aṭanga minute hnih hnu lawkah Tej Tamang chuan si phurh a sut - hun a tawp zui a, 2-1 in India an chak hram.
India coach Igor Stimac chuan, "Match hmasa zawk ai khan team pahnihin kan khel ṭha zawk ve veah ka ngai a, friendly game ni mah se chutiang ang chuan kan khel loa hriatna ka nei," tiin inkhel boruak a san thu a sawi.
Croatian coach chuan sawi zawmin, "Team pahnih player-ten an khelh dan avangin fak an phu a, a bik takin ka player-ten dawhthei taka an khelh avangin fak an phu lehzual. Goal khung turin an dawhthei a, Nepal tlarhnung inhawn hun an nghak hram hram bawk.
"Goal kan khung hnuah inrintawkna kan nei a, kan khelh dan tur ang takin kan khel zui. A pumpui thlir chuan match hnih kan khelhah kan ṭha zawk a, hnehna chan kan phu a ni. Nepal team-in hma an sawn a, India pawhin hmasawnna tur tam tak kan la nei a ni," a ti.
India-in October-ah South Asian Football Federation Championship an hmachhawn zui dawn a, an match hmasa ber chu Ocotber 4 khian Bangladesh nen an khel ang.
Maldives-in a thlen tur inelna hi October 1-16 inkara khelh tur a ni a, India, Bangladesh, Maldives, Nepal leh Sri Lanka-te an inkhel ang - team panga hi an intum kual vek hnuah a sang pahnihin final an khel dawn a ni.
September 2, Ningani
India 1-1 Nepal
IND: Anirudh Thapa 60'
NEP: Anjan Bista 36'
September 5, Pathianni
Nepal 1 - 2 India
NEP: Tej Tamang 87'
IND: Farukh Chaudhary 62'; Sunil Chhetri 80'