Wales beiseina chhi nungtu Bale

Belarus laka mualpho thei dinhmuna ding hman Wales chu Gareth Bale-a'n a chhan chhuak a, Real Madrid forward hattrick hmang hian khualmualah 3-2 in hnehna hlado an chham.

Wales-in khualmualah minute ngana lekah goal hmahruai an khung a, Belarus goalkeeper Sergei Chernik-a'n Bale a tih tluk avangin penalty a chawi a, season hmasa Tottenham Hotspur lama hun hmang Bale-a'n harsatna nei loin goal-ah a chantir.

Goal an khung hma avangin Wales hi awlsam takin an chak mai dawn niin a lang hman a, mahse, Belarus-in tum dan dang an lo nei a, mahni muala tlawm mai an tum lo.

Minute 29-naah Belarus tan Vitali Lisakovich chuan penalty hmang vekin si phurh a sut a, minute khat pawh a ral hmain Wales tlarhnung pherh zarah Pavel Sedko chuan goal khat dang a khung bawk.

Awlsam taka chak tura ngaih Wales an hnufual a, an mamawh chu 'chhandamtu' a ni. Minute 69-naah penalty hmang bawkin Bale-a'n an si phurh sutna goal-a khung a, 2-2 a an ṭin mai dawna a lan hnu, injury time-ah chakna goal a khung zui.

Kum 32 mi Bale hian ram tan match 16 zet chu goal khung loin hun a hmang tawh a, a khung leh meuh chuan hattrick a ni nghal - ram tan match 98 a khelh aṭangin goal 36 a khung tawh.

Real Madrid coach thar Carlo Ancelotti enkawlna hnuaiah Bale a hlim thar a, chu chu ram tana a khelhnaah pawh a lang chhuak. Bale dik tak hmuh zel fan-ten an beisei ang.

Group E-ah Wales hian match thum khelh aṭangin point ruk chiah an la nei a, Belgium (5 matches, 13 points) leh Czech Republic (5 matches, 7 points) te nen group khata an awm ho avangin a awlsam dawn lo - Nilaini zan dar 12:15-ah Estonia an mikhual dawn.