Coutinho hma hun hriatthiam a har

Barcelona-in nipui transfer-a an hralh theih loh Philippe Coutinho chu Nou Camp-ah a cham chhunzawm zel a, Liverpool midfielder hlui hman dan turah Barca an inngaihtuah buai hle nia sawi a ni.

Kar hmasa lawka Lionel Messi kalsan tak number 10 ha tura Barca-in an thlem nia sawi Coutinho hian January 2018 khan Catalan club hi a zawm a, beisei erawh a phak lo.

Ronald Koeman chuan hliam dam tawh Coutinho hi a player pawimawhah a ngai nia sawi a ni a, mahse, match 90-a khelh tlin tawh avangin harsatna a awm tlat - media ṭhenkhat tarlan danin Coutinho hian Barca tan match 100 a khel tling a nih chuan Catalan club hian Liverpool hnenah euro maktaduai 20 an pek belh a ngai dawn.

Barca-in Coutinho an lei khan pound maktaduai 105 an pe phawt a, a khelh ṭhat dan a zira pound maktaduai 142 thlenga sang chho thei turin an inrem - he contract-ah hian match 100 a khelh tlina Barca-in pawisa an pek belh dan tur chu a inziak tel.

Catalan club hi sum lamah an talbuai mek a, hei vang hian Lionel Messi leh Antoine Griezmann pawh an chelh thei lo - Coutinho hian tun season-ah match 100 khel tling ta se a hlawh tam tak piahlamah sum an pek chhuah a ngai dawn tihna a ni.

Kum 29 mi Coutinho hian kar khatah £383,000 vel a hlawh anga ngaih a ni a, a hlawh ringawt pawh phurrit a tlin lai hian a man pek chhuah hi Barca tan a harsa dawn - Barca-in Coutinho an chhawr zel dan tur hriat a châkawm ta hle.