Pakistan coach Misbah-ul-Haq a bang

Pakistan cricket team head coach Misbah-ul-Haq leh bowling coach Waqar Younis te chu an hna aṭangin an bang a, Pakistan international hlui off-spinner Saqlain Mushtaq leh all-rounder Abdul Razzaq te chu coach lailawk atan ruat an ni.

Shaheens (Pakistan sawina) hian September 17 aṭangin New Zealand nen ODI series an khel dawn a, he hunah hian coach lailawk pahnih hian Pakistan team an kaihruai dawn a ni.

Pakistan coach aṭanga chawl ta Misbah leh Waqar te hian September 2019 aṭang khan an ram team enkawl hna hi an thawk ṭan a, kum khat dang contract la nei mah se an hna bansan an thlang.

Coach pahnihin an hna an bansan chhan hi Covid-19 vang a ni ber - inkhelin an zinkual reng lo thei lo a, heng hunah hian inkhel tur bikte chauh awm theihna hmunah dah niin, fimkhur taka enkawl an ni ṭhin a, chhuak hleithei loa inkhunghran reng an ning a ni ber!

Misbah chuan, "West Indies series zawha Jamaica-a kan inkhunghran lai khan thla 24 liam taa kan hun tawn leh international cricket-a kan hmachhawpte ka thlir a, ka chhungte hlata hun rei tak ka la hmang tur leh, inkhunghran reng ngai tur chu ka ngaihtuah a, chawlh mai ka thlang ta a ni," a ti.

Waqar chuan, "Pakistan bowler-te thawhpui a lungawithlak a, hma pawh an sawn hle. Mahse, thla 16 liam ta chhunga inkhunghran reng mai kha, kan inkhelh hunlaia kan la tawn ve loh thil a ni a, a harsa em em a ni," tiin a sawi ve bawk.

West Indies-a tour zo hlim Pakistan hian New Zealand nen September 17 - 21 inkarah ODI seriers match thum an khel ang a, September 25 - October 3 inkarah Twenty20 series match nga an khel leh dawn bawk a ni.