Switzerland-in Italy an chelh

World Cup khel tur zawnnaah Pathianni zan khan European champion Italy chu Switzerland-in an chelh. St. Jakob-Park-a inkhelah Azzurri tan Jorginho-a'n penalty a hlah.

Roberto Mancini hoten point hnih hloh mah se point 11 hmuin group C hmahruaitu an ni a, chutihrualin an hnuai chiaha awm Switzerland hian match hniha khel tlem chunga point sarih an hmuh avangin Azzurri tan ngaih ṭha taka awm theih a ni lo.

Italy hian Nilaini zan dar 12:15 hian Lithuania an mikhual dawn a, Switzerland-in Nothern Ireland an tlawh thung ang. Group khat aṭangin ram pakhat an tling nghal dawn a, pahnihnain playoff an khel dawn. Playoff-ah hian ram 12 an awm dawn a, hmun ruak pathum chauh a awm dawn avangin pakhatna nih hi a pawimawh hle.

Switzerland captain Yann Sommer a che ṭha, Azzurri tlarhmaa awm Ciro Immobile, Lorenzo Insigne leh Domenico Berardi te a dansak vek. Berardi phei chuan keeper Sommer chauh a hmachhawn hnuah a ti goal lo.

Second half-ah Swiss defender Ricardo Rodriguez ṭum hnih a chesual nawn a, ball a pass sual hnuah box chhungah Berardi a tlawh avangin penalty a chawi.

UEFA Men's Player of the Year Award dawngtu Jorginho a rawn pen chhuak a, amaherawhchu Sommer-a'n a mansak. Swiss keeper hi a che ṭhat tluan avangin Italy-in goal an khung thei lo a, 0-0 in inkhel a tawp.

Italy hian Bulgaria leh Switzerland lakah point khat ve ve chauh hlawh chhuak thei mah se match 36 chhung hneh loh an tawn tawh loh avangin kum 1993 leh 1996 chhunga Brazil record an nihrual. Mancini hote hian Nilaini zana Lithuania an mikhual hunah record an siam ngei a rinawm ta hle.