Halep ngamtu Svitolina

Tokyo Olympic bronze medalist Elina Svitolina chuan Grand Slam vawi hnih champion tawh Simona Halep chu 6-3, 6-3 a hnehin US Open quarterfinal a lut.

Round hmasa lamah world numbert 1 Ashleigh Barty leh champion lai Naomi Osaka te an lo tla tawh bawk a, tunah chuan seeded pangana Svitolina hi Flushing Meadows-a nomawi chawi rinkai ber a ni ta.

Kum 26 mi Svitolina chuan, "Set hmasa berah khan 3-3 a nih khan game hloh thei dinhmunah ka ding, 15-40 in ka hniam zawk a nih kha. Chesual loa game ka la let thei khan engkim a chingfel a ni ber mai, a hnu lamah chuan a harsa tawh lo," tiin a sawi.

Ukrainian nula hian a match lehpekah chuan Leylah Fernandez a hmachhawn leh dawn. Kum 19 mi chauh Fernandez hian Angelique Kerber chu 4-6, 7-6 (7-5), 6-2 in a hneh. Canadian tleirawl hian a match hmasa zawkah champion lai Naomi Osaka a lo hneh tawh bawk.

Fernandez chuan, "Tennis ka khelh ṭan tirh aṭang khan engtik niah emaw chuan Grand Slam ka la khel ve ang tih ka suangtuah ṭhin, tunah chuan ka khel satliah mai ni loin quarterfinal hial ka thleng ta, a tawpna ni lo se," tiin chak zel a la tum.

Inkhel dangah seeded pahnihna Aryna Sabalenka chuan doble faults ṭum 10 ngawt nei mah se Elise Mertens chu 6-4, 6-1 in a hneh. Player pahnih hi tun hma chuan doubles huangah an ṭangdun ṭhin, tunah erawh an inhmachhawn a ngai.

Belarusian star Sabalenka hian Barbora Krejcikova a hmachawn leh dawn. French Open champion hian world number 1 hlui Garbine Muguruza chu 6-3, 7-6 (7-4) in a lo hneh ve thung a ni.