Arsenal leh Conte ten inremna nei lo

Premier League season bul ṭan ṭha lo Arsenal chu season liam taa Serie A champion puitu Antonio Conte nen sawizawm an ni a, khawthlang media ṭhenkhat chuan inremna nei tawh hialin an ziak.

Amaherawhchu, Conte nena inhnimhnai tak football agent Federico Pastorello chuan, "Arsenal leh Conte ten inremna an nei tih chu thuthang dik lo a ni," tiin a sawi.

Arsenal hian league match hmasa pathumah Brentford, Chelsea leh Manchester City te an hneh lo a, goal kua chhuah tawhin goal an la khung lo. Gunners hian September 11, Inrinni zan hian Championship champion Norwich City an mikhual dawn a, hnehna an chang lo a nih chuan manager Mikael Arteta dinhmun derthawng sa a chhiat belh ngei ang.