Bencic hmachhawn tur Emma Raducanu

US Open khelh laiah hmeichhe singles champion tur rin thiam a harsa. Last 16 inkhelah Emma Raducanu chuan Shelby Rogers chu 6-2, 6-1 in a hneh, set khatna tawp lam leh set hnihna tir lamah a zawnin game 11 zet a la!

Kum 18 mi Raducanu hian tun hmain US Open a la khel ngai lo, tun ṭum hi New York khawpuia inelna a hmachhawn vawi khatna a ni. Qualifying aṭangin a inlan ṭan a, tunah zet chuan quarterfinal a thleng der tawh.

British tleirawl hian semifinal thleng tur chuan Belinda Bencic a paltlang leh a ngai dawn. Tokyo Olympic champion Bencic hian inkhel dangah 2020 French Open champion Iga Swiatek chu 7-6 (14-12), 6-3 in a lo hneh ve thung a, a khelh ṭhat tluan lai tak a ni.

Raducanu chuan, "Shelby kha player ṭha a ni, a bik takin US Open-ah a khel ṭha. Kei chuan midangte ṭhatna leh theihna lam ka ngaihtuah ve phak meuh lo a, eng tiangin nge ṭha takin ka khelh theih ang tih chu ka ngaihtuah ber a ni," tiin a sawi.

Wimbledon aṭanga mi hriat hlawh Raducanu hmabak erawh a harsa tawh dawn. A hma a ding tur Swiss star Bencic hian 2019 khan Flushing Meadows-ah hian semifinal a lo thleng tawh, tawnhriat a nei ṭha - inelna neih laia set la hloh lo Raducanu nen an inkhel tur hi a hmuhnawm ang.

Inkhel dangah Maria Sakkari chuan 2019 champion Bianca Andreescu chu 6-7 (2-7), 7-6 (8-6), 6-3 in a lo hneh ve thung a, a vawi khat nan US Open quarterfinal a inhlangkai. Greek nula hian Wimbledon finalist Karolina Pliskova a hmachhawn ve leh thung dawn a ni.