Djokovic leh Zverev ten quarterfinal an lut

An point score han en thuak chuan, harsa lo takin Novak Djokovic-a'n world number 99 Jenson Brooksby hnehin US Open quarterfinal a lut niin a lang, mahse a takah erawh a ni hauh lo.

Nimin zing last 16 inkhelah Djokovic-a'n fiahna hautak a paltlang a, darkar hnih leh minute 59 chhungin 1-6, 6-3, 6-2, 6-2 in hnehna a chang - Grand Slam match a khelh hnuhnung 25 zetah a zawnin hnehna a chang ta.

Inkhel dangah Alexander Zverev pawhin Jannik Sinner chu 6-4, 6-4, 7-6 in a hneh a, a thiam pariat zingah a inhlangkai ve bawk. Zverev leh Djokovic te hi an match lehpekah an chak a nih chuan semifinal-ah an in hmachhawn ang.

Djokovic a hmachhawn hmain Zverev hian Lloyd Harris a tum leh phawt a ngai dawn. Season hmasa US Open finalist Zverev hi tun hnai inelna hrang hrangah match 15 chak zawn tawh a ni a, Olympic champion a nih bawk avangin inrintawkna a nei sang hle.

Insiamṭhat ngai
Flushing Meadows, New York-a inkhelah mi hriat hlawh lo Brooksby-a'n mipui a barakhaih. Grand Slam singles match vawi riat a khelhna chauh ni mah se, set hmasa berah seeded pakhatna Djokovic lakah game khat chauh a hloh, set hmasa a la der!

Mahse, set hnihna aṭang chuan Djokovic-a'n a tawnhriat neih a hmang ṭangkai, inkhel ti muangin a hmanhmawh duh lo a, a pawimawh laiah tak zel a khingpui service chhuhsakin a tawpah chuan a chungnung zawk a ni ta tho.

Chak mah se Djokovic hian unforce errors vawi 41 zet a nei a, ama tih sual avanga a khingpuiin point a hmuh hi a tam hle. Seeded parukna Matteo Berrettini nen an inhmachhawn hunah chuan tih sual neih tam hi a pawi thui thei tawh khawp ang.

Italian tlangval Berrettini hian inkhel dangah German tlangval Oscar Otte chu 6-4, 3-6, 6-3, 6-2 in a lo hneh ve thung. Berrettini leh Djokovic te hi Wimbledon final-ah khan an lo inhmachhawn tawh a, set li an khelh hnuah Novak a chak.

Match thum chauh
Kum 34 mi Djokovic hian Grand Slam title 20 a la tawh, mipa singles huangah chuan Roger Federer leh Rafael Nadal te nen an pathumin an champion hnem lam a inang - tun ṭumah hian Federer leh Nadal te hi an inlan ve lo.

Major title la hnem ber ni turin Djokovic dinhmun a ṭha ta viau, a match khelh hmabak pathumah a chak leh thei a nih chuan player ropui pahnih leh a elpui ni bawkte khi a khum ang, record a hnaih sawt viau.

Djokovic chuan, "Grand Slam match hmasa ber ka khelh aṭangin kum 16 zet a liam ta. Ka hun tawn tawh zawng zawngte kha hriat vek sen a ni tawh lo, a tlangpui ngaihtuah chuan zin kawng nuam leh hlimawm tak chu a ni," a ti a, tawp mai a la tum lo.

Season hmasa khan US Open aṭang hian Djokovic hi hnawl (disqualify) a lo ni tawh. Tun season New York khawpuia a inkhelh tawh chinah Serbian tlangval hi a la inthunun thei viau a, quarterfinal aṭangin match a hautak zual dawn avangin a mize dik tak lan theihna tur a ni ang.