Mizoram cricket team an puang

Cricket Association of Mizoram (CAM) chuan Syed Mushtaq Ali Trophy (One Day) 2021-2022 season khel tur player 20 hming a tarlang a, player thlan chhuahte hian ngawrh takin training an nei mek.

CAM Academy, Ramhlun Sports Complex-ah hun eng emaw chen training kalpui a ni a, vawiin aṭang hian Suaka Cricket Ground, Sihhmuiah training an nei chhunzawm ang. Ruahman dan chuan October 27 hian Bengaluru lamah tournament khelh hmain inbuatsaihna an nei leh ang.

State pawn player
Mizoram team-ah hian danin a phal angin state pawn player pathum telh an ni. Indian Premier League club Kings XI Punjab tana khel tawh Uday Kaul, Kolkata Knight Riders leh Royal Challengers Bangalore tana khel tawh Iqbal Abdulla bakah Taruwar Kohli te an ni.

India Under-19 cricket team tana khel tawh Kaul-a hi wicketkeeper a ni a, kum 33 mi a ni tawh avangin a vanglai a pel tawh - 2019 aṭang khan Chandigarh tan a khel a, tunah chuan Mizoram aiawh tura thlan zingah a tel.

IPL team pahnih tana khel thei Iqbal Abdulla hian tawnhriat nei ṭha. IPL a khelh loh hnuah Kerala tan a khel a, 2017 aṭanga nikum thleng khan Mumbai tan a khel phak, tun ṭumah erawh Mizoram tan a ball vawm thiamna a hmang ang.

Tualchhung player
Mizoram tana sulhnu nei ṭha G. Lalbiakvela chu koh zinga hming langsar a ni. Luangmual tlangval hian tualchhung inelna lamah erawh second divison club tan a khel a, inelna hnuhnung Khaled Memorial-ah khan Luangmual chu table-ah pathumna a nih pui.

Mahuma Memorial champion Chanmarians team aṭangin captain Bobby Zothansanga, Lalhmangaiha (Ahmatea), K. Lalremruata bakah an player thar Lalhruaizela te an tel a, tualchhung mai bakah ram pum huapa hming chher an tum ang.

Chanmarians ang bawka point 12 hmutu Chhinga Veng leh Ramhlun Venglaiin player an thawh bawk. Hripui leng vangin CAM season kal laiah tournament khelh tam theih a ni lo a, khelh laklawh lai ṭhenkhat pawh zawh fel hman a ni loh avangin player thlan kawngah pawh tehna a inang vek thei lo niin a lang.