FIFA-in pawi a ti

Football thuneitu sang FIFA chuan Argentina leh Brazil ten World Cup qualifier match an khel thei lo chu pawi an ti a, engtik hunah nge an inkhelh ṭhat leh dawn tih erawh hriat a la ni lo thung.

Pathianni zan khan South American ram pahnihte hi an inkhel ṭan hman a, mahse khelmual chhungah Brazil damdawi lam thuneitute lutin match khelh chhunzawm theih a ni ta lo.

FIFA chuan, "Match report kan dawng a, mipui tam takin en tuma an lo nghah an khel thei ta lo hi a pawi kan ti hle. Hma la tur bik hnenah thlen a ni a, anni chuan thutlukna an siam ang," an ti. Ram pahnih hian Zirtawpni zingah ram hran ve ve an hmachawn leh dawn.

Brazil sorkarin hripui leng vangin inkaihhruaina dan a siam a, red list zinga a dah Britain aṭanga hawte chu ni 14 khung hran an ngai. Premier League player Emiliano Buendia, Emiliano Martinez, Giovani lo Celso leh Cristian Romero te an tel avangin inkhel hi a khaihlak a ni.