Super Mario, i hun a liam ve ta...

September 3 khan football khawvelin chanchin lawmawm lo tak hriat a nei a, chu chu Mario Mandzukic chawlh thu a ni - Croatian legend hian a chawlh thu a puang.

Kum 35 mi striker hian season hmasa kha AC Milan tan a khel a, hliamin a tlakbuak avangin match 11-a khelhah goal a khung lo - a chawlh a hun ve taah a ngai a, a ballboot a khai ve ta.

Super Mario hming lem an pek hi 2012-13 season-a treble champion Bayern Munich team-ah a tel a, World Cup 2018 final khel Croatia team-ah a tel bawk.

Mandzukic hian a phu angin fak hlawh tawk lo mah se a nomawi hunna hmun en chuan player tam takte mang ram ang maia ropui a ni a, he striker hian ropui taka thlah liam a phu a ni.

A bul ṭanna
'Croatian War of Independence' tia sawi ṭhin, kum 1991-a Croatian sipaiten Socialist Federal Republic of Yugoslavia (SFRY) aṭanga zalenna an sual lai khan Mandzukic hi kum nga mi lek a la ni a, indo hrehawm kara a seilian tur chu a chhungten ngaingam loin an tlanchhiatpui.

Bosnia ramri depa awm an khua Slavonski Brod aṭangin Germany lam panin an puanthuah an tel a, khaw lian lem lo tak pakhat, Germany-a Ditzingen-ah an tlanchhia.

Germany-ah thil thar engkimin Mandzukic a lo hmuak a, mahse, an rama an neih tel loh 'muanna' a neih tel avangin a thla a muang. Kum 1992-ah khan German club tenau TSF Ditzingen youth team chu kum ruk mi niin a zawm a, indo thuthang ngawt hre ṭhin naupang khan football chu hahchawlh nan a hmang.

Croatia ramin ngai a awh chho a, a ralmuang ta maw tihah kum 1996 khan Mandzukic leh a chhungte chu an ngaih ber, an khua Slavonski Brod-ah an kir a, hetah hian an khaw club Marsonia a zawm zui.

Professional zinkawng
Kum 2004 khan Mandzukic-a'n a professional career ṭanin Marsonia tan a khel a, Croatian second division-ah match 23 khelin goal 14 ngawt a khungsak nghal - professional football-a season hmasa ber hman dan atan chuan duhthusam a ni.

Hetihlaia Croatian rawlthar duhawm Mandzukic-a theihna enin Croatian second division leka khel reng chi a ni lo tih chu NK Zagreb lamin an hrethiam thuai a, Croatian top flight football khel turin he striker ṭhangduang hi an thlem chhuak.

Mandzukic-a'n NK Zagreb-a a season hmasa berah beisei angin a khel lo a, match 28-ah goal thum 'lek' a khung. Mahse, 'talent' chu thup bo reng theih a ni lo a, parchhuah hun a awm leh nge nge ṭhin.

Croatian top division-a a season hnihnaah Mandzukic-a'n a theihna a pholang a, inelna hrang hrangah match 27 khelin goal 14-a khung a, Croatian club lar Dinamo Zagreb an lo lang vat.

Eduardo thlaktu
Arsenal ṭantute chuan kum 2007-a beiseina sang tak nena Eduardo da Silva an lakluh kha an la hre reng ang - Brazil mi, Croatia tana inkhelh thlang Eduardo khan 2006-07 season-ah khan Dinamo tan match 47 khelin goal 47-a khung tehreng a nih kha!

Hetihlaia English club huhang ngah tak Arsenal-in Eduardo an thlem lut vat a, pound maktaduai 7.5-in Croatian club aṭangin an thlem lut. Dinamo lamin a thlakna tur an zawng vat a, a chhanna chu Mandzukic a ni.

Mandzukic hi euro maktaduai 1.3 lekin an lalut a, Eduardo aia hlawhtling tur zawk striker an lalut - a season khatnaah match 47 khelin goal 20 a khung a, a season hnihnaah phei chuan match 43-ah goal 24 a khung!

Dinamo tan 2009-10 season-ah match 37 khelin goal 17 a khung a, Bundesliga club VfL Wolfsburg an lo lang nghal. German club hi euro maktaduai sarihin a zawm a, season hnih a khelh chhungin match 60-ah goal 20 a khungsak.

Hei le Bayern!
Eduardo thlaktu atana Dinamo-in an lakluh striker khan beisei aia sang a thleng a, kum 2012-a thlen meuh chuan Bayern Munich an lo lang tawh - German club lian hi euro maktaduai 13-in a zawm a, a season hmasa ber chu 'duhthusam' ang mai a ni.

Bayern tan league match 24 khelin goal 15 a khungsak a, club top scorer a ni. Inelna hrang hrangah match 40 khelin goal 22 zet a khung a, a season hmasa berah hian treble champion a nihpui!

Mandzukic hi a tikimtu mai a ni lo - Champions League final-a Borussia Dortmund 2-1 a an hnehna inkhelah pawh goal hmahruai a khung a, treble nomawi an chawi nan a thawhhlawk hle.

Bayern-a a season hnihnaah pawh match 48 khelin goal 26 a khung a, Bundesliga leh DFB-Pokal nomawi a chawi nawn. Mahse, Mandzukic-a'n coach Pep Guardiola-a system leh a khelh dan a inan loh thu a sawi a, chhuah a dil.

Ram ṭha lehzual...
Mandzukic-a'n Bayern chhuahsanin Atletico Madrid a pan a, match 43-ah goal 20 khung mah se Spanish Super Cup-ah bak nomawi a chawi lo. Season khat lek hnuah Atletico chhuahsanin Juventus a pan a, a hma angin goal khung tam tawh lo mah se player ṭangkai a la ni reng.

Juventus tan season li chhungin match 162 a khel a, goal 44 a khung - Serie A nomawi pali a chawi a, Coppa Italia (3) leh Supercoppa Italiana (1) nomawi a chawi tel bawk a, Qatar club Al-Duhail leh AC Milan zawm leh mah se ngai a awh leh tawh lo a, football-a chawlhsan ta.

Mandzukic chanchin sawi a nih apiangin Champions League 2017 final kha thailan tel a ni fo ṭhin - Real Madrid-in Cristiano Ronaldo goal hmanga hma an hruai hnuah Mandzukic hian si phurh sutna goal mawi bik a khung.

Croatian striker hian Gonzalo Higuaín hnen aṭanga a ball hmuh chu a awmin a la thla a, yard 15 vela hla aṭangin mawi zetin a 'bin' lut - 4-1 in Juve tlawmzui mah se Champions League goal mawi zingah he goal hi sawi fo a ni tawh ang.